ԵՐԵՎԱՆ, 30 ՕԳՈՍՏՈՍԻ, ՆՈՅՅԱՆ ՏԱՊԱՆ: Բանկային համակարգ, որպես այդպիսին, Հայաստանում գոյություն չունի: Այսպիսի հայտարարություն արեց օգոստոսի 30-ի ասուլիսում տնտեսագետ Էդուարդ Աղաջանովը: Նրա խոսքերով, բանկային համակարգը բնութագրող ամենակարեւոր ցուցանիշը համակարգի կողմից տնտեսությունում ֆինանսական միջնորդության մակարդակն է: Ըստ Է.Աղաջանովի, պաշտոնական վիճակագրության համաձայն ՀՀ բանկային համակարգի կողմից վարկավորման ծավալ/ՀՆԱ հարաբերակցությունը կազմում է մոտ 9%, որտեղ ներառված են նաեւ սպառողական վարկերը: Իսկ ներդրումային վարկերի ծավալ/ՀՆԱ հարաբերակցությունը կազմում է 7-8%: Է.Աղաջանովի խոսքերով, հայկական բանկերը «սարսափելի մեծ շահույթներ են ստանում» ոչ թե տնտեսության վարկավորման, այլ բանկային մյուս գործառնությունների իրականացման շնորհիվ: Դա է պատճառը, որ ՀՀ բանկային ծառայությունների շուկան հետաքրքրում է արտերկրի բանկերին:

---