2007 Թ.-Ի ԱՌԱՋԻՆ ԿԻՍԱՄՅԱԿՈՒՄ ԵՐԵՎԱՆՈՒՄ ԲԱԶՄԱԲՆԱԿԱՐԱՆ
ՇԵՆՔԵՐԻ ԲՆԱԿԱՐԱՆՆԵՐԻ ՄԻՋԻՆ ԳԻՆԸ ՆԱԽՈՐԴ ՏԱՐՎԱ ՆՈՒՅՆ
ԺԱՄԱՆԱԿԱՀԱՏՎԱԾԻ ՀԱՄԵՄԱՏ 23,5%-ՈՎ ԱՃԵԼ Է
14-08-2007 22:00:00 | Հայաստան | Տնտեսություն
ԵՐԵՎԱՆ, 14 ՕԳՈՍՏՈՍԻ, ՆՈՅՅԱՆ ՏԱՊԱՆ: 2007թ.-ի
հունվար-հունիսին Երեւան քաղաքում արձանագրված անշարժ գույքի
առքուվաճառքի 7029 գործարքներից 4698-ն իրականացվել է
բազմաբնակարան շենքերի բնակարանների նկատմամբ: ՀՀ Ազգային
վիճակագրական ծառայության տվյալներով, նախորդ տարվա նույն ամիսների
համեմատ Երեւանում բազմաբնակարան շենքերի բնակարանների
առքուվաճառքի գործարքների քանակն աճել է ընդամենը 0,5%-ով:
2007թ.-ի առաջին վեց ամիսներին մայրաքաղաքում բազմաբնակարան
շենքերի բնակարանների 1 քառ.մ մակերեսի շուկայական միջին գինը
կազմել է 241,3 հազար դրամ (մոտ 690 ԱՄՆ դոլար)` 2006թ.-ի նույն
ամիսների համեմատ աճելով 23,5%-ով:
2007թ.-ի հունվար-հունիսին ՀՀ մարզերում բազմաբնակարան
շենքերի բնակարանների 1 քառ.մ մակերեսի շուկայական միջին գների
ամենաբարձր ցուցանիշն արձանագրվել է Կոտայքի մարզի Աբովյան
քաղաքում` 134,4 հազար դրամ, իսկ ամենացածրը Լոռու մարզի Շամլուղ
քաղաքում` 3000 դրամ: