ԿՈՆԳՐԵՍԸ ՔՎԵԱՐԿԵԼ Է ԻՐԱՔԻՑ ԱՄԵՐԻԿՅԱՆ ԶՈՐԱԿԱԶՄԻ ԴՈՒՐՍԲԵՐՄԱՆ
ՕԳՏԻՆ
13-07-2007 14:00:00 | ԱՄՆ | Միջազգային
ՎԱՇԻՆԳՏՈՆ, 13 ՀՈՒԼԻՍԻ, ՆՈՅՅԱՆ ՏԱՊԱՆ: ԱՄՆ Կոնգրեսը քվեարկել
է Իրաքից ամերիկյան զորքերի մինչեւ 2008թ. ապրիլի 1-ը դուրս
բերելու օգտին: Այս մասին հաղորդում են տեղական լրատվամիջոցները:
Այս օրինագծի համար կողմ է քվեարկել ԱՄՆ-ի Ներկայացուցիչների
պալատի 223 անդամ, որտեղ մեծամասնություն են կազմում Դեմոկրատական
կուսակցության ներկայացուցիչները: Դեմ է քվեարկել Պալատի 201
անդամ:
Օրինագծի համաձայն, ԱՄՆ-ի պաշտպանության նախարարը պարտավոր է
օրինագծի ընդունումից 120 օր հետո Իրաքում սկսել ամերիկյան զինված
ուժերի թվի կրճատման գործընթացը, ինչն իր ավարտին պետք է հասցվի ոչ
ուշ, քան մինչեւ 2008թ. ապրիլի 1-ը:
Այս օրինագծի քննարկումից առաջ ԱՄՆ-ի նախագահ Ջորջ Բուշը
Սպիտակ տանը մամլո ասուլիսի ժամանակ հայտարարել է, թե պատրաստ է
վետո դնել Կոնգրեսի` Իրաքից ամերիկյան զորքերի դուրսբերմանը
վերաբերող բոլոր օրինագծերի վրա. «Անպայման կօգտագործեմ իմ վետոյի
իրավունքը: Ես չեմ գտնում, որ Կոնգրեսը պետք է ղեկավարի պատերազմը:
Իմ կարծիքով նրա գործը մեր զորքերի ֆինանսավորումն է»,- նշել է
ԱՄՆ-ի նախագահը: