ԱՄՆ-Ը ՄԵՐԺԵԼ Է ԳԱԲԱԼԱՅԻ ՌՏԿ-Ի ՀԱՄԱՏԵՂ ՕԳՏԱԳՈՐԾՄԱՆ
ՌՈՒՍԱՍՏԱՆԻ ԱՌԱՋԱՐԿԸ
09-07-2007 17:10:00 | ԱՄՆ | Միջազգային
ՎԱՇԻՆԳՏՈՆ, 9 ՀՈՒԼԻՍԻ, ՆՈՅՅԱՆ ՏԱՊԱՆ: Միացյալ Նահանգների
իշխանությունները մտադիր չեն հրաժարվել Լեհաստանում եւ Չեխիայում
ՀՀՊ տարրեր տեղակայելուց` Ռուսաստանի հետ համատեղ Ազդրբեջանում
գտնվող Գաբալայի ՌՏԿ-ի օգտագործման դիմաց, հաղորդում է «Դեյ.ազը»:
«Մենք համաձայն ենք, որ դա կարող է դառնալ Ամերիկայի եւ
Ռուսաստանի սերտ համագործակցության ոլորտ եւ վիթխարի բեկում
կատարել, սակայն դա ապագայի հարց է, իսկ առայժմ մենք անհրաժեշտ ենք
համարում առաջ մղել մեր պայմանավորվածությունները Չեխիայի եւ
Լեհաստանի հետ»,- հայտարարել է ԱՄՆ-ի պետքարտուղար Կոնդոլիզա
Ռայսը:
Ըստ Ռայսի, ՀՀՊ շուրջ ստեղծված իրավիճակը Ռուսաստանի եւ ԱՄՆ-ի
նախագահները քննարկել են հուլիսի 1-2-ը Քեննեբանկքփորթում իրենց ոչ
պաշտոնական հանդիպման ժամանակ: «Մենք տարաձայնություններ ունենք
Ռուսաստանի հետ, սակայն այդ հանդիպմանը, կարծում եմ, մենք
կարողացանք որոշարկել հավանական բնագավառները համագործակցության
համար: Շատ է քննարկվել այնպիսի երկրների հրթիռներից պաշտպանության
խնդիրը, ինչպիսին են Իրանը եւ Հյուսիսային Կորեան: Ռուսաստանը որոշ
առաջարկներ է արել, որ նրանք քննության կառնեն տարածաշրջանային
ճարտարապետությունը գործողության հեռու շառավղով հրթիռների
սպառնալիքի դիմագրավման համար ապագայում»,- հայտարարել է Կ.Ռայսը:
Հիշեցնենք, որ Գերմանիայում գագաթնաժողովի ժամանակ Ռուսաստանի
նախագահ Վ.Պուտինը ԱՄՆ-ին առաջարկեց համատեղ օգտագործել
Ադրբեջանում գտնվող Գաբալայի ՌՏԿ-ն: