ԼԵՎՈՆ ԳՈՒԼՅԱՆԸ ԱՌՆՉՈՒԹՅՈՒՆ Է ՈՒՆԵՑԵԼ ՍՊԱՆՈՒԹՅԱՄԲ ԱՎԱՐՏՎԱԾ
ՄԻՋԱԴԵՊԻՆ ԵՎ ԹԱՔՑՐԵԼ Է ՍՊԱՆՈՒԹՅՈՒՆԸ ԿԱՏԱՐՈՂ ԱՆՁԱՆՑ
ԻՆՔՆՈՒԹՅՈՒՆԸ,- ՀԱՅՏԱՐԱՐՈՒՄ Է ՈՍՏԻԿԱՆՈՒԹՅՈՒՆԸ
ԼԵՎՈՆ ԳՈՒԼՅԱՆԸ ԱՌՆՉՈՒԹՅՈՒՆ Է ՈՒՆԵՑԵԼ ՍՊԱՆՈՒԹՅԱՄԲ ԱՎԱՐՏՎԱԾ
ՄԻՋԱԴԵՊԻՆ ԵՎ ԹԱՔՑՐԵԼ Է ՍՊԱՆՈՒԹՅՈՒՆԸ ԿԱՏԱՐՈՂ ԱՆՁԱՆՑ
ԻՆՔՆՈՒԹՅՈՒՆԸ,- ՀԱՅՏԱՐԱՐՈՒՄ Է ՈՍՏԻԿԱՆՈՒԹՅՈՒՆԸ
22-05-2007 22:10:00 | Հայաստան | Հասարակություն
ԵՐԵՎԱՆ, 22 ՄԱՅԻՍԻ, ՆՈՅՅԱՆ ՏԱՊԱՆ: Համարելով, որ զանգվածային
լրատվամիջոցներում եւ հասարակության մեջ շարունակում են շահարկվել
Լեւոն Գուլյանի մահվան հանգամանքները` «հանիրավի որակումներ տալով
ոստիկանության որոշ աշխատակիցների, ինչպես եւ չարամտորեն
անվանարկելով ոստիկանությունն ընդհանրապես», ՀՀ Ոստիկանության
հասարակայնության հետ կապի եւ լրատվության վարչությունը մայիսի
22-ին տարածել է հաղորդագրություն` ներկայացնելով ՀՀ Ոստիկանության
պետի կողմից նշանակված ծառայողական քննության նախնական
արդյունքները:
Ըստ այդմ, մայիսի 9-ի ժամը 20:40-ի սահմաններում Երեւանի
Մանանդյան փողոցի թիվ 17 շենքի առաջին հարկում գտնվող «Պանդոկ»
ռեստորանի մոտ մի խումբ անձանց միջեւ վիճաբանության եւ ծեծկռտուքի
ժամանակ հրազենի գործադրմամբ սպանվել է Ստեփան Գագիկի Վարդանյանը:
Հաղորդագրության համաձայն, հիմնավորված է, որ կրակոցները հնչել են
այն ընթացքում, երբ իր ռեստորանի մուտքի մոտ տեղի ունեցող տեւական
վիճաբանության ձայների վրա Լ.Գուլյանը դուրս է եկել ու մոտեցել
վիճաբանողներին: Նշվում է, որ Ս.Վարդանյանի դիակը հայտնաբերվել է
«Պանդոկի» մուտքից մոտ 1,5 մետրի վրա, իսկ սպանվածի կողքին
հայտնաբերվել է Լ.Գուլյանի բջջային հեռախոսի մարտկոցը: «Այնպես
որ,- ըստ ոստիկանության հաղորդագրության,- առավել քան բավարար
ապացույցներ կային, որ նա առնչություն է ունեցել սպանությամբ
ավարտված միջադեպին»:
Նախաքննության շրջանակներում «մայիսի 10-ին ոստիկանության
Շենգավիթի բաժնում Լ.Գուլյանի հետ զրուցել է ՀՀ Ոստիկանության
Քրեական հետախուզության գլխավոր վարչության պետի առաջին տեղակալ
Հ.Թամամյանը»: Այնուհետեւ Ա.Գուլյանին հարցաքննել են Շենգավիթ
համայնքի դատախազությունում: Ըստ ոստիկանության հաղորդագրության,
«հարցաքննությունների ժամանակ Լ.Գուլյանը թաքցրել է գործին առնչվող
կարեւոր հանգամանքներ եւ սպանությոնը կատարող անձանց
ինքնությունը»:
Մայիսի 12-ին ՀՀ Ոստիկանության ՔՀԳՎ-ի 2-րդ վարչության առաջին
բաժնի պետի աշխատասենյակում շուրջ 30 րոպե Լ.Գուլյանի հետ
զրուցելուց հետո բաժնի պետը դուրս է եկել սենյակից` արդյունքները
ՔՀԳՎ-ի ղեկավարությանը զեկուցելու համար, ինչից հետո Գուլյանը
աշխատասենյակում գտնվող աշխատակցից ջուր է խնդրել եւ օգտվելով նրա
բացակայությունից ժամը 15:20-ի սահմաններում փորձել է փախչել
սենյակի պատուհանից եւ վայր է ընկել: Մինչ շտապ բուժօգնության
ժամանելը ոստիկանության աշխատակիցները փորձել են օգնություն
ցուցաբերել նրան, սակայն Լ.Գուլյանը ստացած մարմնական
վնասվածքներից մահացել է:
Իսկ ոստիկանության գնդապետ Հ.Թամամյանը, ըստ ծառայողական
քննության նախնական արդյունքների, մայիսի 10-ից ի վեր Լ.Գուլյանի
հետ որեւէ առնչություն չի ունեցել:
Լ.Գուլյանի մահվան կապակցությամբ Երեւան քաղաքի
դատախազությունում հարուցված քրեական գործի նախաքննությունը եւ ՀՀ
ոստիկանության պետի կողմից նշանակված ծառայողական քննությունը
շարունակվում են: Ընթացքի մեջ է նաեւ Ստեփան Վարդանյանի սպանության
փաստով հարուցված քրեական գործի նախաքննությունը: