2010 Թ.-ԻՑ ԿԱՐԳԵԼՎԻ ՕԶՈՆԱՅԻՆ ՇԵՐՏԸ ՔԱՅՔԱՅՈՂ ՆՅՈՒԹԵՐԻ
ՆԵՐՄՈՒԾՈՒՄԸ ՀԱՅԱՍՏԱՆ
17-05-2007 18:10:00 | Հայաստան | Հասարակություն
ԵՐԵՎԱՆ, 17 ՄԱՅԻՍԻ, ՆՈՅՅԱՆ ՏԱՊԱՆ: ՀՀ կառավարության մայիսի
17-ի նիստում հաստատվել են օզոնային շերտը քայքայող նյութերի
ներմուծման ընդհանուր չափաքանակները: Ինչպես նիստից հետո
լրագրողների հայտնեց ՀՀ բնապահպանության փոխնախարար Սիմոն Պապյանը,
որոշման նպատակն է աստիճանաբար օգտագործումից հանել այն նյութերը,
որոնք քայքայում են օզոնային շերտը: Մասնավորապես, այդպիսի
նյութերից է ֆրեոնը, որը գործածվում սառնարանային
սարքավորումներում, օդափոխիչներում:
Ս.Պապյանը նշեց, որ կառավարության որոշման համաձայն,
2007-2010թթ.-ին Հայաստան կարելի է ներմուծել տարեկան 29,5 տոննա
օզոնային շերտը քայքայող նյութեր, իսկ 2010թ.-ից դրանց ներմուծումը
կարգելվի: Նշվեց, որ 2004թ.-ին ներմուծվել է օզոնային շերտը
քայքայող 110 տոննա, 2005թ.-ին` 50 տոննա նյութեր: