ԵՐԵՎԱՆ, 13 ԱՊՐԻԼԻ, ՆՈՅՅԱՆ ՏԱՊԱՆ: Համաշխարհային կինոյի լեգենդ Չարլզ Սպենսեր Չապլինի ծննդյան օրվա` ապրիլի 16-ի կապակցությամբ, Հայաստանի Ազգային պատկերասրահի կինոդահլիճում ապրիլի 14-15-ը տեղի կունենա Համր ֆիլմերի փառատոն, ուր կցուցադրվեն տարածաշրջանի երկրներում ստեղծված համր ֆիլմեր: Չապլինին նվիրված ֆիլմերի ցուցադրություն կկազմակերպվի նաեւ «Մոսկվա» կինոթատրոնում: Ինչպես «ՆՈՅՅԱՆ ՏԱՊԱՆ»-ի թղթակցի հետ զրույցում նշեց Հայաստանի Ազգային պատկերասրահի կրթական բաժնի աշխատակից Մելիք Կարապետյանը, արդեն 5-րդ անգամ Երեւանում կազմակերպվում է Չապլինի ծննդյան օրվան նվիրված ֆիլմերի ցուցադրություն: Առաջին երկու տարիներին դրանք անցկացվել են Երեւանի Խնկո Ապոր անվան մանկական գրադարանում` «Չապլինյան մարաթոն» անվանումով, սակայն արդեն անցյալ տարի Ազգային պատկերասրահում առաջին անգամ կազմակերպվեց Համր կինոյի ռեգիոնալ փառատոն:

---