ՀՀ ՏՆՏԵՍԱԿԱՆ ԴԱՏԱՐԱՆԸ ԸՆԴԴԵՄ ԿԱՌԱՎԱՐՈՒԹՅԱՆ 6
ՌԱԴԻՈԸՆԿԵՐՈՒԹՅՈՒՆՆԵՐԻ ԴԻՄՈՒՄԻ ՔՆՆՈՒԹՅՈՒՆԸ ՀԵՏԱՁԳԵՑ ՄԻՆՉԵՎ ՄԱՐՏԻ
22-Ը
12-03-2007 18:40:00 | Հայաստան | Հասարակություն
ԵՐԵՎԱՆ, 12 ՄԱՐՏԻ, ՆՈՅՅԱՆ ՏԱՊԱՆ: ՀՀ Տնտեսական դատարանը
մինչեւ մարտի 22-ը հետաձգեց ընդդեմ ՀՀ կառավարության 6
ռադիոընկերությունների հայցադիմումի քննությունը: Այսպիսով
դատարանը բավարարեց պատասխանող կողմի` հայցվորների
առարկություններին ծանոթանալու համար ժամանակ տրամադրելու
վերաբերյալ, միջնորդությունը:
Հիշեցնենք, որ ռադիոընկերությունները պահանջում են անվավեր
ճանաչել հեռարձակման հաճախականության համար վարձավճար սահմանելուն
առնչվող ՀՀ կառավարության որոշումը, ըստ որի Տրանսպորտի եւ կապի
նախարարությունը լիազորվել է սահմանել եթերավճարի չափը: Ըստ դիմող
կողմի,ՀՀ Սահմանադրության 45-րդ հոդվածի համաձայն հարկերի,
տուրքերի եւ այլ պարտադիր վճարների սահմանման կարգը եւ չափը պետք է
կարգավորվեն օրենքով: Սակայն, «Հեռուստատեսության եւ ռադիոյի
մասին» օրենքում ոչինչ չի ասվում եթերավճարի չափի եւ սահմանման
կարգի մասին:
Ըստ պատասխանող կողմի ներկայացուցիչ, ՀՀ Տրանսպորտի եւ կապի
նախարարության իրավաբանական վարչության պետ Արտաշես Հովսեփյանի,
ռադիոընկերությունների պահանջը անհիմն է, քանի որ իրավական ակտերի
մասին օրենքի համաձայն կառավարությունը կարգավորում է այն
իրավահարաբերությունները, որոնք ՀՀ Սահմանադրությամբ, օրենքով, կամ
նախագահի հրամանագրերով կարգավորված չեն:
Նշենք նաեւ, որ փետրվարի 27-ի նիստում բավարարելով
ռադիոընկերությունների շահերը ներկայացնող փաստաբան Օլգա
Սաֆարյանի` կառավարության պատասխանին ծանոթանալու եւ իր
առարկությունները ներկայացնելու համար ժամանակ տրամադրելու
վերաբերյալ, միջնորդությունը դատարանը գործի քննությունը հետաձգել
էր մինչեւ մարտի 12-ը: :