ԱՄԵՆԱՅՆ ՀԱՅՈՑ ԿԱԹՈՂԻԿՈՍԸ ՖՐԱՆՍԻԱՅԻՑ ԿՄԵԿՆԻ ՀՆԴԿԱՍՏԱՆ
19-02-2007 17:17:00 | Հայաստան | Հասարակություն
ԷՋՄԻԱԾԻՆ, 19 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 17-ին
Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց
Կաթողիկոսը մեկնել է Փարիզ, ուր մասնակցում է Ֆրանսիայում Հայաստանի
տարվա պաշտոնական բացման արարողությանը եւ Հայրապետական իր
օրհնությունը կբերի թեմական պատգամավորական անդրանիկ ժողովին:
Ինչպես «ՆՈՅՅԱՆ ՏԱՊԱՆ»-ին հայտնեցին Մայր Աթոռ Սբ. Էջմիածնի
Տեղեկատվական համակարգից, փետրվարի 22-ին Ֆրանսիայից Նորին
Սրբությունը Հովվապետական այցով կմեկնի Հնդկաստան: Տասնօրյա այցի
ընթացքում Նորին Սրբությունը կլինի Դելի, Կալկաթա, Մադրաս եւ
Բոմբեյ քաղաքներում, կայցելի ՀՀ դեսպանատուն, հանդիպումներ կունենա
հայ համայնքի ներկայացուցիչների հետ: Նորին Սրբությունը կհանդիպի
Կալկաթայի Մարդասիրական ճեմարանի պաշտոնեությանը եւ
ուսանողությանը: Ամենայն Հայոց Կաթողիկոսը կայցելի նաեւ տարբեր
հայկական սրբավայրեր, այդ թվում Արեւելքի հնագույն քրիստոնեական
եկեղեցիներից մեկը` Չինսուրայի Սուրբ Հովհաննու Կարապետի հայկական
եկեղեցի:
Այցի ժամանակ նախատեսվում են նաեւ պաշտոնական հանդիպումներ:
Հնդկաստան այցի ընթացքում ՎԵհափառ Հայրապետին ուղեկցելու են
Ավստրալիայի եւ Նոր Զելանդիայի հայոց թեմի առաջնորդ Աղան
արքեպիսկոպոս Պալիոզյանը, Մայր Աթոռի միաբան Վարդան աբեղա
Նավասարդյանը, Կտրիճ քահանա Դեւեջյանը եւ Հովնան աբեղա Հակոբյանը`
որպես գավազանակիր: