Հայաստանում 2008թ.-ին պաշտպանության ծախսերը նախորդ տարվա
համեմատ աճել են 25%-ով
29-05-2009 19:32:00 | Հայաստան | Տնտեսություն
ԵՐԵՎԱՆ, 29 ՄԱՅԻՍԻ, ՆՈՅՅԱՆ ՏԱՊԱՆ: Հայաստանում հասարակական
կարգի, անվտանգության եւ դատական գործունեության բնագավառում
2008թ.-ի պետբյուջեից տրամադրվել է 61,7 մլրդ դրամ: Մայիսի 29-ին
ՀՀ Ազգային Ժողովում 2008թ.-ի պետական բյուջեի կատարման մասին
տարեկան հաշվետվության նախագծի նախնական քննարկումների ժամանակ ՀՀ
փոխոստիկանապետ Հովհաննես Հունանյանը հայտնեց, որ ոստիկանության
բնագավառում իրականացվող 6 ծրագրերի համար տրամադրվել է 27 մլրդ
դրամ, որից 20,8 մլրդ-ը` հասարակական կարգի պահպանման ապահովման
համար: 2007թ.-ի համեմատ ծախսերն աճել են 12%-ով կամ 2,2 մլրդ
դրամով, ինչը, հիմնականում, պայմանավորված է աշխատավարձի եւ դրան
հավասարեցված վճարների ավելացմամբ:
Ի պատասխան «Ժառանգություն» խմբակցության ղեկավար Արմեն
Մարտիրոսյանի հարցի, ոստիկանապետի տեղակալը նշեց, որ տարվա
ընթացքում ձեռք են բերվել ոստիկանության համար անհրաժեշտ հատուկ
միջոցներ, այդ թվում` վահաններ, մահակներ, սաղավարտներ, կապի
միջոցներ: Մինչեւ ընթացիկ տարվա սեպտեմբեր ոստիկանությունը կունենա
եւս երկու ջրցան մեքենա ի հավելումն արդեն եղածների, որոնք անսարք
վիճակում էին, սակայն նորոգվել են:
Ըստ Ազգային անվտանգության ծառայության պետի տեղակալ Ֆելիքս
Ցոլակյանի, ոլորտին 2008թ.-ին հատկացված 12,6 մլրդ դրամի
ֆինանսավորումը կատարվել է գրեթե ամբողջությամբ: 2007 թ.-ի համեմատ
ֆինանսավորումն ավելացել է 12%-ով կամ 2,2 մլրդ դրամով:
Հիմնականում միջոցներն ուղղվել են համակարգի պահպանման ծախսերին:
4,9 մլն դրամ ուղղվել է կապիտալ շինարարությանը, այդ թվում`
հայ-վրացական սահմանին երկու նոր ուղեկալների կառուցմանը:
Ինչպես լրագրողներին տեղեկացրեց ՀՀ ֆինանսների նախարարի
տեղակալ-գլխավոր գանձապետ Ատոմ Ջանգուղազյանը, 2008թ.-ին
պաշտպանութան բնագավառի ծրագրերի համար տրամադրվել է 121,2 մլրդ
դրամ: 2007թ.-ի համեմատ այս բնագավառի ծախսերն աճել են 25,1%-ով: