Համաշխարհային բանկը եւս 35 միլիոն դոլար կրամադրի Հայաստանին
27-02-2009 17:44:00 | Հայաստան | Տնտեսություն
ԵՐԵՎԱՆ, 27 ՓԵՏՐՎԱՐԻ, ՆՈՅՅԱՆ ՏԱՊԱՆ: Համաշխարհային բանկը
հայտարարել է, որ պարզեցված համակարգով առաջին օժանդակությունը
տրամադրում է Հայաստանին եւ Կոնգոյին` օգնելու այդ երկրներին
հաղթահարել համաշխարհային ֆինանսական ճգնաժամի հետեւանքները: Բանկի
Միջազգային զարգացման ընկերակցության կողմից (IDA) Հայաստանին
հատկացվել է 35 միլիոն, Կոնգոյին` 100 միլիոն դոլար փոխառություն:
Ըստ «Ազատություն» ռադիոկայանի, Համաշխարհային բանկի խորհուրդը
հաստատել է փոխառությունները` հաշվի առնելով «հստակ նշանները, որ
երկու երկրներում ժողովուրդները տուժում են ճգնաժամից»:
Օրերս Համաշխարհային բանկը հաստատել էր Հայաստանին
հատկացվելիք չորս փոխառությունների փաթեթը` 85 միլիոն դոլար
ընդհանուր գումարով, ինչպես նաեւ երկրին տրամադրվելիք 1,5 միլիոն
դոլարի դրամաշնորհը Գլոբալ էկոլոգիական հիմնադրամից:
Հայաստանի վարչապետ Տիգրան Սարգսյանը անցած շաբաթավերջին
«Ազատություն» ռադիոկայանին տեղեկացրել էր, որ Հայաստանի
կառավարությունը եւ Համաշխարհային բանկը համաձայնություն են ձեռք
բերել 525 միլիոն դոլարի շուրջ: «Դրանք ծրագրեր են, որոնք ուղղված
են լինելու ենթակառուցվածքների ձեւավորմանը, կրթական համակարգի
բարեփոխումներին, այսինքն` Համաշխարհային բանկի հետ մեր ծրագրերը
բոլոր ոլորտների հետ առնչություն ունեն, եւ կարծում ենք, որ այդ
ծրագրերի արագ, էֆեկտիվ իրականացումը կմեղմի համաշխարհային
տնտեսական ճգնաժամի բացասական ազդեցությունները մեզ վրա», - ասել
էր վարչապետը: