ՈՒԵՖԱ-Ի ՎԵՀԱԺՈՂՈՎՈՒՄ ԸՆՏՐՎԵՑ ՆՈՐ ՆԱԽԱԳԱՀ, ԲԱՅՑ
ՀԱՅԱՍՏԱՆ-ԱԴՐԲԵՋԱՆ ՀԱՆԴԻՊՈՒՄՆԵՐԻ ՀԱՐՑԸ ՉԼՈՒԾՎԵՑ
26-01-2007 18:12:00 | Գերմանիա | Սպորտ
ԴՅՈՒՍԵԼԴՈՐՖ, 26 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 26-ին
Դյուսելդորֆում իր աշխատանքն ավարտեց ՈՒԵՖԱ-ի վեհաժողովը:
Կազմակերպության անդամ 52 երկրների ներկայացուցիչների
քվեարկությամբ 27 ձայն հավաքեց եւ նոր նախագահ ընտրվեց ֆրանսիացի
Միշել Պլատինին: Այժմ արդեն նախկին նախագահ Լենարդ Յոհանսոնը
(Շվեդիա) ստացավ 23 ձայն:
Եվրո-2008-ին խմբային մրցաշարի ծրագրով Հայաստանի եւ
Ադրբեջանի ֆուտբոլի ազգային հավաքականների մրցավայրի ընտրության
շուրջ քննարկումներ ունեցան 2 երկրների ազգային ֆեդերացիաների
նախագահները: Հայաստանն առաջարկեց հանդիպումներն անցկացնել եւ
Հայաստանում, եւ Ադրբեջանում, իսկ Ադրբեջանը առաջարկեց 2
հանդիպումն էլ անցկացնել չեզոք դաշտում: Ի վերջո, կողմերը
համաձայնության չեկան, եւ հարցը նորից քննարկման կդրվի
առաջիկայում: Որոշումը պետք է կայացվի առաջնության մեկնարկից
առնվազն 2 ամիս առաջ` մինչեւ հունիսի վերջը: