ՄԻԱՅՆԱԿ ԿԵՆՍԱԹՈՇԱԿԱՌՈՒՆԵՐԻ ՀԱՄԱՐ ՍԱՀՄԱՆՎԵԼ Է ԸՆՏԱՆԵԿԱՆ
ՆՊԱՍՏ ՍՏԱՆԱԼՈՒ ԻՐԱՎՈՒՆՔԻ ԱՌԱՎԵԼ ԲԱՐԵՆՍՊԱՍՏ ԳՈՐԾԱԿԻՑ
26-01-2007 17:25:00 | Հայաստան | Հասարակություն
ԵՐԵՎԱՆ, 26 ՀՈՒՆՎԱՐԻ, ՆՈՅՅԱՆ ՏԱՊԱՆ: Ընտանեկան նպաստի
վճարումների համար այս տարի պետբյուջեից կհատկացվի 26 մլրդ 429 մլն
(մոտ 72,4 մլն ԱՄՆ դոլար)` 2006թ.-ի 24 մլրդ 337 մլն-ի դիմաց:
Ինչպես հունվարի 26-ի ասուլիսում հայտնեց ՀՀ Աշխատանքի եւ
սոցիալական հարցերի նախարարության Սոցիալական աջակցության
վարչության պետ Աստղիկ Մինասյանը, ընտանեկան նպաստի միջին չափը
2007թ.-ին կկազմի 17 հազար դրամ (2006թ.-ին` 15 հազար դրամ): Ըստ
նրա, ակնկալվում է, որ այս տարի ընտանեկան նպաստի համակարգում
կընդգրկեն 125 հազար 400 ընտանիքներ: Իսկ 2006թ.-ին ընտանիքի
անապահովության գնահատման համակարգում հաշվառված 182 հազար
ընտանիքներից ընտանեկան նպաստ են ստացել 130 հազարը:
Փոխնախարար Արծվիկ Մինասյանը նշեց, որ ընտանեկան նպաստ
ստանալու համար ընտանիքի անապահովության սահմանային միավորը
2007թ.-ին կմնա նույնը` 33,00: Ըստ նրա, ընտանեկան նպաստի բազային
մասը մինչեւ 18 տարեկան անդամներ չունեցող ընտանիքների համար
կկազմի 7500 դրամ (2006թ.-ին` 7000 դրամ), իսկ մինչեւ 18 տարեկան
անդամներ ունեցողների համար` 7000 դրամ (2006թ.-ին` 7000 դրամ):
Ա.Մինասյանը նշեց, որ ընտանիքների անապահովության գնահատման
կարգում կատարված փոփոխության համաձայն, միայնակ
կենսաթոշակառուների համար սահմանվել է առավել բարենպաստ գործակից:
Այսպես, եթե նախկինում կենսաթոշակի բարձրացման պատճառով վերջիններս
դուրս էին մնում համակարգից, ապա 2007թ.-ին միջին կենսաթոշակի չափի
2500 դրամով աճի դեպքում էլ նրանք կշարունակեն նպաստ ստանալ:
Ա.Մինասյանը հայտնեց նաեւ, որ 2007թ.-ի հունվարի 1-ից
համակարգում հաշվառված այն ընտանիքները, որոնցում կծնվի երրորդ կամ
դրան հաջորդող երեխան, կստանան 200 հազար միանվագ դրամական
օգնություն: