ՀԱՅԿԱԿԱՆ ՊԱՏՎԻՐԱԿՈՒԹՅՈՒՆԸ ՉԻ ՄԱՍՆԱԿՑԻ ՆՈՅԵՄԲԵՐԻ 22-23-ԻՆ
ԲԱՔՎՈՒՄ ԳՈՒՄԱՐՎԵԼԻՔ ՍԾՏՀ ԽՎ-Ի ՆՍՏԱՇՐՋԱՆԻՆ
20-11-2006 20:50:00 | Հայաստան | Տնտեսություն
ԵՐԵՎԱՆ, 20 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 22-23-ին
Բաքվում կգումարվի Սեւծովյան տնտեսական համագործակցության
Խորհրդարանական վեհաժողովի 28-րդ նստաշրջանը, որին հայկական
պատվիրակությունը չի մասնակցի: Պատճառը պատվիրակության անդամների
անվտանգության երաշխիքների բացակայությունն է:
Ինչպես հայտնեց հայկական պատվիրակության ղեկավար, ՀՀ Ազգային
Ժողովի Ֆինանսավարկային, բյուջետային եւ տնտեսական հարցերի մշտական
հանձնաժողովի նախագահ Գագիկ Մինասյանը, ինքը նախապես պաշտոնապես
դիմել է ադրբեջանական կողմին` երաշխիքներ ստանալու ակնկալիքով,
սակայն դիմումը մնացել է անարձագանք: Գ.Մինասյանը ստիպված է եղել
միջնորդելու խնդրանքով դիմել նաեւ ՍԾՏՀ ԽՎ-ի միջազգային
քարտուղարություն, որի կենտրոնակայանը գտնվում է Ստամբուլում: Ըստ
նրա, ստացվել է գլխավոր քարտուղար Ալեքսեյ Կուդրյավցեւի պաշտոնական
հաղորդագրությունը առ այն, որ ադրբեջանական իշխանություններին
ուղղված իր գրավոր եւ բանավոր դիմումներին պատասխան չի ստացվել: