ԻԼՀԱՄ ԱԼԻԵՎ. ԱԴՐԲԵՋԱՆԸ ՄԵԾ ՈՒՇԱԴՐՈՒԹՅՈՒՆ Է ԴԱՐՁՆՈՒՄ
ՏՐԱՆՍՊՈՐՏԱՅԻՆ ՍԵԿՏՈՐԻ ԶԱՐԳԱՑՄԱՆԸ
31-10-2006 18:38:00 | Ադրբեջան | Միջազգային
ԲԱՔՈՒ, 31 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Ադրբեջանը տարածաշրջանի
կենտրոնն է ինչպես տնտեսական, այնպես էլ քաղաքական տեսակետներից»:
Այս մասին, ինչպես հաղորդում է «Թրենդը», այսօր Գյանջայի
օդանավակայանի բացման ժամանակ հայտարարել է Ադրբեջանի նախագահ
Իլհամ Ալիեւը:
«Մենք մեծ ուշադրություն ենք դարձնում տրանսպորտային սեկտորի
զարգացմանը, քանի որ տրանսպորտային ենթակառուցվածքի առկայությունը
թույլ է տալիս արագացնել մնացած մարզերի զարգացումը: Այսօր
Գյանջայում շահագործման հանձնվեց նոր օդանավակայանը: Օդանավակայան
է կառուցվում Լենքարանում, կկառուցվի Զաքաթալայում:
Ավտոճանապարհներ են կառուցվում մինչեւ Վրաստանի, Իրանի եւ
Ռուսաստանի հետ սահման, շարունակվում է նավագնացության
զարգացումը»,- նկատել է Ալիեւը:
Գյանջայի նոր օդանավակայանն ունի 3300 մետր երկարությամբ
թռիչքա-վայրէջքային գոտի: Կառուցվել է նաեւ նոր ճանապարհ, որ
օդանավակայանը կապում է Գյանջա-Ղազախ մայրուղուն:
«Ադրբեջանի տնտեսությունը զարգանում է արագացված տեմպերով,
աճում են աշխատավարձերը, իրականացվում է դպրոցների, առողջապահական
հաստատությունների շինարարություն: Մասնավորապես Բաքվում
բնակարանային շինարարությունը այնպիսի արագացված տեմպերով է
իրականացվում, որ մենք նույնիսկ փորձում ենք կասեցնել այն»,- ասել
է նա:
Նշենք, որ այսօր լրանում է նախագահ Իլհամ Ալիեւի
պաշտոնակալության ճիշտ երեք տարին: Նա նշել է, որ երեք տարում
կատարվել են իր տված բոլոր խոստումները: