ԲԱՔՈՒ, 19 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 23-ին Փարիզում ԵԱՀԿ Մինսկի խմբի համանախագահները մտադիր են կոնսուլտացիաներ անցկացնել: Այս մասին «Թրենդին» հայտնել է ԵԱՀԿ ՄԽ ռուս համանախագահ Յուրի Մերզլյակովը: Կոնսուլտացիաները կկայանան Հայաստանի եւ Ադրբեջանի արտաքին գործերի նախարարներ Վարդան Օսկանյանի եւ Էլմար Մամեդյարովի բանակցությունների հերթական փուլի նախօրեին: Միջնորդները կոնսուլտացիաներ կվարեն նաեւ նախարարների հանդիպումից հետո: Մեկնաբանելով Ադրբեջանի եւ Հայաստանի պաշտպանության նախարարների հանդիպում կազմակերպելու մասին ԵԱՀԿ գործող նախագահի անձնական ներկայացուցիչ Անջեյ Կասպրշիկի առաջարկությունը, Յու. Մերզլյակովը հայտնել է, որ այդ նախաձեռնությունն առաջ է քաշվել հակամարտության կողմերի միջեւ վստահության միջոցների բարձրացման շրջանակում: Այդ հարցը քննարկվել է նաեւ ԱԳՆ ղեկավարների հանդիպումների ժամանակ, սակայն գտնվում է ԵԱՀԿ ղեկավարի անձնական ներկայացուցիչ Անջեյ Կասպրշիկի լիազորությունների շրջանակում, ամփոփել է դիվանագետը:

---