ԱՆԿԱՐԱ, 18 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Երեկ Թուրքիայի
ժամանակով 11.00-ին Անկարայի կենտրոնական հիվանդանոցներից մեկն է
փոխադրվել գիտակցությունը կորցրած Թուրքիայի վարչապետ Ռեջեփ Թայիբ
Էրդողանը:
Հոսպիտալացման պատճառ է դարձել հիպոգլիկեմիկ ճգնաժամը (արյան
մեջ շաքարի մակարդակի կտրուկ փոփոխություն): Տասը ժամ
հիվանդանոցում գտնվելուց հետո կառավարության ղեկավարի վիճակը
բարելավվել է եւ բժիշկները Էրդողանին դուրս են գրել հիվանդանոցից:
Ինչպես լրագրողներին հայտարարել է Թուրքիայի արտաքին գործերի
նախարար Աբդուլլա Գյուլը, վարչապետի վիճակը վախ չի ներշնչում:
«Վարչապետի աշխատանքային ժամանակացույցը վերջին օրերին շատ
լարված է եղել»,- հայտնել է նախարարը հիվանդանոց այցելելուց հետո,
որտեղ գտնվում էր Էրդողանը: «Վարչապետի արյան մեջ կտրուկ փոխվել է
շաքարի մակարդակը, ահա եւ վերջ»,- ավելացրել է ԱԳՆ ղեկավարը:
Էրդողանը, իր գլխավորած «Արդարություն եւ զարգացում»
կուսակցության խորհրդարանական խմբի նիստին մեկնելիս, վատ է զգացել
իրեն եւ նրան շտապ հիվանդանոց են տարել: Երբ վարչապետի ծառայողական
ավտոմեքենան հասել է Անկարայում գտնվող Գյուվենյան հիվանդանոց, եւս
մի դեպք է տեղի ունեցել:
Այսպես, Էրդողանը չի կարողացել բացել ավտոմեքենայի դուռը եւ
դուռը բացելու համար թիկնապահներին հարկ է եղել կոտրել ապակիները:
Վարչապետին դժվարությամբ դուրս են բերել մեքենայից եւ տեղավորել
սրտաբանական բաժանմունքում, որտեղ նա հետազոտվել է: Պարզվել է, որ
հոգնածության եւ պաս պահելու հետ կապված նրա արյան մեջ կտրուկ
նվազել է շաքարի տոկոսը եւ ընկել է ճնշումը,- հաղորդում է
«Նովոստի» գործակալությունը: