ԻԼՀԱՄ ԱԼԻԵՎՆ ԸՆԴՈՒՆԵԼ Է ԵԱՀԿ ՄԽ-Ի ՀԱՄԱՆԱԽԱԳԱՀՆԵՐԻՆ, ԻՍԿ
ՂԱԿ-Ը ՊԱՀԱՆՋՈՒՄ Է ԴԱԴԱՐԵՑՆԵԼ ՆՐԱՆՑ ԳՈՐԾՈՒՆԵՈՒԹՅՈՒՆԸ
02-10-2006 19:49:00 | Ադրբեջան | Միջազգային
ԲԱՔՈՒ, 2 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 2-ին Բաքվում
Ադրբեջանի նախագահ Իլհամ Ալիեւն ընդունել է ԵԱՀԿ Մինսկի խմբի
համանախագահներին: Ըստ Ադրբեջանի նախագահի աշխատակազմի մամլո
ծառայության հաղորդման, հանդիպման ընթացքում կարծիքների փոխանակում
է կայացել ղարաբաղյան հակամարտության կարգավորման
բանակցությունների ներկա իրավիճակի եւ հեռանկարների առնչությամբ:
Իր հերթին, ադրբեջանական Ղարաբաղի ազատագրության
կազմակերպությունը (ՂԱԿ) տարածել է հայտարարություն` դատապարտելով
ԵԱՀԿ Մինսկի խմբի համանախագահների այցը տարածաշրջան. «ԵԱՀԿ Մինսկի
խմբի համանախագահների կողմնակալ վերաբերմունքը շարունակվում է:
Նրանք հերթական անգամ տարածաշրջան են գնում ոչ թե Ադրբեջանից, այլ
Հայաստանից, եւ մենք դատապարտում ենք այցը ագրեսորական Հայաստան»,-
ասվում է հայտարարության մեջ: Հայտարարության մեջ նշվում է, որ
Մինսկի խմբի համանախագահների վերջին առաջարկությունը լրիվ
համընկնում է Հայաստանի շահերին: ՂԱԿ-ը կարծում է, որ այդ
տարբերակի իրականացումը նշանակում է Լեռնային Ղարաբաղի եւ Լաչինի
կորուստ,- հաղորդում է «Ռեգնում» գործակալությունը:
ՂԱԿ-ը նորից պահանջում է դադարեցնել ԵԱՀԿ Մինսկի խմբի
համանախագահների այցը տարածաշրջան եւ նրանց գործունեությունը: