ԲԵԵՐ ՇԵՎԱ, 4 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Իսրայելի Բեեր Շեւա
քաղաքում ընթացող շախմատի աշխարհի 6-րդ թիմային առաջնությունում
հաջող է հանդես գալիս Հայաստանի հավաքականը: Հերթական` երրորդ
տուրում մրցելով աշխարհի ներկայիս չեմպիոն եւ վերջին օլիմպիադայի
հաղթող Ուկրաինայի թիմի հետ` Հայաստանի շախմատիստները կարողացան
մրցախաղն իրենց օգտին ավարտել 2,5-1,5 հաշվով: Առաջին խաղատախտակի
վրա Լեւոն Արոնյանը հաղթեց աշխարհի ուժաղագույն շախմատիստներից
մեկին` Վասիլի Իվանչուկին: Մյուս երեք խաղատախտակների վրա
ոչ-ոքիներ գրանցվեցին. հաշտություն կնքեցին Վլադիմիր Հակոբյանը եւ
Անդրեյ Վոլոկիտինը, Կարեն Ասրյանը եւ Ալեքսանդր Մոիսեենկոն, Աշոտ
Անաստասյանը եւ Սերգեյ Կարյակինը:
Երրորդ տուրի մյուս հանդիպումներում այսպիսի արդյունքներ
գրանցվեցին. Ռուսաստան-Վրաստան` 2,5-1,5, Իսրայել-Չինաստան
(կանայք)` 2,5-1,5, Չինաստան (տղամարդիկ)-Կուբա` 3,5-0,5:
Առաջնությունը գլխավորում է Ռուսաստանի հավաքականը, որը 8
միավոր ունի: 2-3-րդ տեղերը 7,5-ական միավորով բաժանում են
Հայաստանի եւ Չինաստանի հավաքականները:
Նոյեմբերի 4-ին կայանալիք չորրորդ տուրում Հայաստանի
շախմատիստները կմրցեն ԱՄՆ ներկայացուցիչների հետ: