2004-2008 ԹԹ.-ԻՆ ՀԱՅԱՍՏԱՆՈՒՄ ՆԱԽԱՏԵՍՎՈՒՄ Է ԿԱՌՈՒՑԵԼ ԿԱՄ
ՀԻՄՆԱՆՈՐՈԳԵԼ 900 ՄՇԱԿՈՒՅԹԻ ՏՈՒՆ
24-12-2004 18:35:00 | Հայաստան | Մշակույթ
ԵՐԵՎԱՆ, 24 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում
2004-2008թթ.-ին մշակույթի` ընդհանուր թվով մոտ 900, օջախների
վերանորոգման եւ կառուցման համար կպահանջվի, համապատասխանաբար, մոտ
42 մլն եւ 31 մլն ԱՄՆ դոլար: Ինչպես «ՆՈՅՅԱՆ ՏԱՊԱՆ»-ի թղթակցին
հայտնեց ՀՀ քաղաքաշինության փոխնախարար Սոս Քոչարյանը, մշակույթի
տներ կկառուցվեն այն համայնքներում, որոնք ներկայումս զուրկ են
նման օջախներից: Շինաշխատանքների ֆինանսավորումը նախատեսվում է
իրականացնել թե պետական միջոցներով, թե միջազգային դոնոր
կազմակերպությունների օգնությամբ:
Նշվեց, որ 2004թ.-ի պետբյուջեից հատկացված մոտ 95 մլն դրամով
(172,7 հազ. ԱՄՆ դոլար) վերանորոգման աշխատանքներ են իրականացվել
Օշականի, Սիսավանի, Գնդեվազի մշակույթի տներում, իսկ Գեղարքունիքի
մարզի Ծափաթաղ գյուղում կառուցվել է մշակույթի տան նոր շենք: Ըստ
փոխնախարարի, մշակույթի տների շինաշխատանքների համար 2005թ.-ի
բյուջեի նախագծով նախատեսվում է հատկացնել մոտ 240 մլն դրամ:
Ս.Քոչարյանը հայտնեց նաեւ, որ վերջին տարիներին տարբեր
աղբյուրների ֆինանսավորմամբ հանրապետությունում վերանորոգվել են 60
մշակույթի տներ: