ՀԱՅԱՍՏԱՆԻ ՍՊԱՌՈՂԱԿԱՆ ՇՈՒԿԱՅՈՒՄ ԹԵՐԱԿՇՌՈՒՄԸ ԴԱՐՁԵԼ Է
ԳՆԱԳՈՅԱՑՈՒԹՅԱՆ ԼՈՒՐՋ ԳՈՐԾՈՆ
10-01-2008 15:45:00 | Հայաստան | Հասարակություն
ԵՐԵՎԱՆ, 10 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստաանի սպառողական
շուկայում անմենատարածված խախտումներից է թերակշռումը, որն այսօր
դարձել է գնագոյացման լուրջ գործոն: Այս մասին հունվարի 10-ի
ասուլիսում հայտնեց «Սպառողների իրավունքների պաշտպանություն»
հասարակական կազմակերպության նախագահ Աբգար Եղոյանը: Նա նշեց, որ
համաձայն «Չափումների միասնականության ապահովման մասին» ՀՀ օրենքի,
առնվազն տարին մեկ անգամ պետք է իրականացվի կշեռքների պարտադիր
ստուգաչափում: Մինչդեռ, ՀՀ Ազգային չափագիտության ինստիտուտի
2007թ.-ի տվյալներով, առեւտրի օբյեկտներում օգտագործվող մոտ 25
հազար կշեռքներից ստուգաչափվել են միայն 6000-ը: Իսկ չստուգաչափված
կշեռքների օգտագործման համար սահմանված տուգանքի չափը, ինչպես նշեց
Ա.Եղոյանը, կազմում է ընդամենը 50-100 հազար դրամ (մոտ 165-330 ԱՄՆ
դոլար):
Ըստ Ա.Եղոյանի, մանրածախ առեւտրում օգտագործվող էլեկտրոնային
կշռող սարքերում որոշ փոփոխություններից հետո դրանք կարող են
թերակշռել 200-300 գրամ: Ինչ վերաբերում է փողոցային առեւտրում
օգտագործվող կենցաղային ձեռքի կշեռքներին, ապա դրանց կիրառումը
օրենքով արգելված է: Ա.Եղոյանի խոսքերով, այդ կշեռքները թերակշռում
են 300-500 գրամ:
«Ակնհայտ է, որ խնդիրը չափազանց արդիական է եւ պահանջում է
հրատապ, համակարգված լուծում»,- նշեց ՀԿ-ի նախագահը: Ա.Եղոյանի
համոզմամբ, կշռող սարքավորումների շահագործման վերահսկողությունը
չպետք է սահմանափակվի միայն տեսչական մարմինների գործունեությամբ:
Խնդրի լուծման համար ՀԿ-ն առաջարկում է, մասնավորապես,
խստացնել կշռող սարքերի շահագործման կանոնների խախտման համար
սահմանված պատժամիջոցները` տուգանքի չափը բարձրացնելով մինչեւ
200-300 հազար դրամը: Բացի այդ, առաջարկվում է առեւտրի կետերում
տեղադրել ստուգիչ կշեռքներ, ինչը գնորդներին հնարավորություն կտա
տեղում ստուգել գնած ապրանքի քաշը: