ԲՐՅՈՒՍԵԼ, 21 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ԵՄ ինը «նոր» երկրներ միացել են Շենգենյան անայցագրային գոտուն: Այդպիսով, այսօր շենգենյան համաձայնագրի երկրների թիվը հասել է 24-ի: Հոկտեմբերին Եվրահանձնաժողովը հավանություն էր տվել Շենգենին Էստոնիայի, Լատվիայի, Լիտվայի, Հունգարիայի, Լեհաստանի, Չեխիայի, Սլովակիայի, Սլովենիայի եւ Մալթայի միավորմանը: Նոյեմբերի 15-ին այդ որոշումը պաշտպանել էր Եվրախորհրդարանը: Այսօր Շենգենի հին երկրների հետ այդ պետությունների սահմանների վրա կվերացվեն հսկիչ-անցակետերը ավտոմոբիլային եւ երկաթուղային ճանապարհներին, ինչպես նաեւ օդանավակայաններում: Ընդ որում վիզային հսկողության վերացումը օդանավակայաններում, տեխնիկական նկատառումներով, հետաձգվել է մինչեւ 2008 թվականի մարտի 30-ը:

---