ԿՈՇԻՆ, 30 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հնդկաստանի Կոշին
քաղաքում անցկացված աշխարհի մինչեւ 20 տարեկան շախմատիստների
առաջնությունում խոշոր հաջողության հասավ Հայաստանի ներկայացուցիչ
Տիգրան Լ. Պետրոսյանը: Երեւանցի գրոսմայստերը շվեյցարական
խաղակարգով անցկացված մրցումների 13 մրցափուլերում 8 հաղթանակ
տարավ, 3 հանդիպում ավարտեց ոչ-ոքի, 2 պարտություն կրեց եւ 9,5
միավորով 2-3-րդ տեղերը բաժանեց նույնպիսի արդյունք ցույց տված
չինացի շախմատիստ Յուն Ժաոյի հետ: Քանի որ Տիգրանն ավելի բարձր
մրցաշարային գործակիցներ ուներ, նրան էլ շնորհվեց 2-րդ տեղն ու
արծաթե մեդալը: Իսկ աշխարհի չեմպիոն դարձավ հնդիկ ճանաչված
գրոսմայստեր Պենտալա Հարիկրիշնան, որը 13 հնարավորից 10 միավոր
վաստակեց:
Աշխարհի մինչեւ 20 տարեկան շախմաըիստների փոխչեմպիոնի կոչմանն
արժանանալը մեծ նվաճում է Տիգրան Լ. Պետրոսյանի համար:
Ընդհանրապես, 2004 թվականը, որը ՖԻԴԵ-ի կողմից հռչակվել է աշխարհի
9-րդ չեմպիոն Տիգրան Պետրոսյանի տարի, շատ հաջող էր նրա կրտսեր
ազգանվանակցի համար: Տարեսկզբին Տիգրանը բարձր արդյունք ցույց տվեց
Մոսկվայի միջազգային մրցաշարում` «Աերոֆլոտ-օփեն»-ում, ապա հաջող
մրցելույթներ ունեցավ Իրանում անցկացված մրցումներում, նաեւ տարբեր
մրցաշարերում: Մասնագետների կարծիքով, Տիգրան Լ. Պետրոսյանը մոտ
ապագայում կարող է համալրել Հայաստանի ուժեղագույն շախմատիստների
շարքերը: