ՀԱՅԱՍՏԱՆԻ 21 ՇԱԽՄԱՏԻՍՏՆԵՐ ԿՄԱՍՆԱԿՑԵՆ ԱՇԽԱՐՀԻ ՊԱՏԱՆԵԿԱՆ
ԱՌԱՋՆՈՒԹՅԱՆԸ
04-11-2004 15:45:00 | Հայաստան | Սպորտ
ԵՐԵՎԱՆ, 4 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հունաստանի Կրետե կղզում
նոյեմբերի 4-14-ը կընթանա շախմատի աշխարհի պատանեկան
առաջնությունը: Միաժամանակ կանցկացվեն 10 մրցաշարեր, որոնց
հաղթողները պետք է որոշվեն տղաների ու աղջիկների 5 տարիքային` 10,
12, 14, 16 եւ 18 տարեկանների, խմբերում: Հայաստանը
առաջնությունում ներկայացված կլինի մեծ խմբով. Կրետեում հանդես
կգան հայաստանցի 21 շախմատիստ-շախմատիստուհիներ:
Աշխարհի պատանեկան առաջնության բոլոր տարիքային խմբերում
մրցաշարերը կընթանան շվեցարական խաղակարգով, 11 մրցափուլով:
Հիշեցնենք, որ Եվրոպայի 2004թ. պատանեկան առաջնությունում
Հայաստանի ներկայացուցիչները հաջող հանդես եկան. նրանք մեկական
ոսկե եւ արծաթե մեդալներ նվաճեցին: Ամենայն հավանականությամբ,
Հայաստանի տղաներն ու աղջիկները մեդալներից անմասն չեն մնա նաեւ
այս անգամ: