ԿԱՅԱՑԱՎ ՁՅՈՒԴՈՅԻ «ԶԵՅԹՈՒՆԻ ԳԱՎԱԹԻ» 8-ՐԴ ՄԻՋԱԶԳԱՅԻՆ ՄՐՑԱՇԱՐԸ
05-10-2004 19:50:00 | Հայաստան | Սպորտ
ԵՐԵՎԱՆ, 5 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Երեւանի Քանաքեռ-Զեյթուն
համայնքի նախաձեռնությամբ անցկացվեց ձյուդո ըմբշամարտի ավանդական
միջազգային մրցաշարը` «Զեյթունի գավաթի» խաղարկությունը: Արդեն
8-րդ անգամ կազմակերպվող մրցումները մեծ հետաքրքրություն էին
առաջացրել` «Դինամո» մարզադահլիճում ընթացած մրցապայքարին
մասնակցեցին Վրաստանի, Իրանի, Հայաստանի եւ Արցախի 354
ձյուդոյիստներ, որոնք մրցեցին 2 տարիքային խմբերում:
Երիտասարդների խմբում ուժեղագույնը Հայաստանի
ներկայացուցիչներն էին, որոնք ընդհանուր առմամբ 13 մեդալ նվաճեցին:
Պատանիների մրցակցությունում հայ ձյուդոյիստների առավելությունն
ավելի զգալի էր, արդյունքը` 30 մեդալ:
Հայաստանի երիտասարդական հավաքականի գլխավոր մարզիչ Դավիթ
Խիտարյանի կարծիքով, իր թիմի թեկնածուները բավարար
պատրաստականություն ցուցադրեցին եւ կարող են հաջողությամբ հանդես
գալ առաջիկա միջազգային մրցումներում: