ՍՄԲԱՏ ԼՊՈՒՏՅԱՆԻ ՀԵՏ ՄԻԱԺԱՄԱՆԱԿՅԱ ԽԱՂՈՒՄ ԽԱՂԱՂ ԱՐԴՅՈՒՆՔ
ԱՐՁԱՆԱԳՐԱԾ 3 ԽՈՐՀՐԴԱՐԱՆԱԿԱՆՆԵՐԻՆ ԿՀԱՆՁՆՎԻ ԽՐԱԽՈՒՍԱԿԱՆ ՄՐՑԱՆԱԿ
26-05-2004 20:22:00 | Հայաստան | Սպորտ
ԵՐԵՎԱՆ, 26 ՄԱՅԻՍԻ, ՆՈՅՅԱՆ ՏԱՊԱՆ: Միջազգային գրոսմայստեր
Սմբատ Լպուտյանի հետ մայիսի 26-ին խորհրդարանում կայացած
միաժամանակյա խաղում ոչ-ոքիի հասած 3 անձանց կհանձնվի շախմատի
մեկական կոմլեքս: Այս մասին «ՆՈՅՅԱՆ ՏԱՊԱՆ»-ի թղթակցին հայտնեց
միջոցառման նախաձեռնող` ԱԺ-ի Գիտության, կրթության, մշակույթի եւ
երիտասարդության հարցերի մշտական հանձնաժողովի նախագահ Հրանուշ
Հակոբյանը:
Նշենք, որ գրոսմայստերի հետ ուժերը չափած 17 անձանցից, որոնց
թվում էին ԱԺ-ի 12 պատգամավոր, խաղաղ արդյունք էին արձանագրել
միայն պատգամավորի օգնական Արտակ Մանուկյանը, ԱԺ պատգամավորներ
Արմեն Մխիթարյանը («ՀՀԿ» խմբակցություն) եւ Գագիկ Մխեյանը («Օրինաց
երկիր» մբակցություն): Մնացած 14 մասնակիցները պարտվեցին:
«Ես կցանկանայի, որ Հայաստանում սիրողական շախմատը այնքան
զարգացած լիներ, որ նրա ներկայացուցիչները կարողանային
գրոսմայստերներին դիմադրություն ցուցաբերել»,- մինչ խաղի ավարտը
լրագրողներին ասել էր Հայաստանի շախմատի ֆեդերացիայի նախագահ, ՀՀ
պաշտպանության նախարար Սերժ Սարգսյանը: Նա նաեւ համոզմունք էր
հայտնել, որ Հայաստանում չի կարող լինել որեւէ սիրողական մակարդակի
շախմատիստ, որը կարող է նույնիսկ ոչ-ոքի խաղալ անվանի գրոսամյստերի
հետ: Ի տարբերություն Ս.Սարգսյանի, ԱԺ նախագահ Արթուր Բաղդասարյանը
ցանկություն էր հայտնել, որ պատգամավորները կարողանան հաղթել
գրոսմայստերին: Օրվա հերոսը` Սմբատ Լպուտյանը, թեեւ տրամադրված էր
բավականին մարտական, միեւնույն ժամանակ հաջողություն մաղթեց
խորհրդարանականներին, նշելով, որ վերջիններիս հաղթանակը իրեն
կուրախացնի: «Ես ուրախանում եմ, երբ միություն եմ տեսնում
կյանքում, եւ տա Աստված, որ միությունը լինի եւ' մեր ԱԺ-ում, եւ'
մեր հասարակության մեջ»,- ասաց անվանի գրոսմայստերը` խաղին բոլոր
քաղաքական ուժերի ներկայացուցիչների, այդ թվում ընդդիմության,
մասնակցությունը նկատի ունենալով: