Սեպտեմբերի 23-ին Լեռնային Ղարաբաղի Հանրապետության արտաքին գործերի նախարարի պաշտոնակատար Վասիլի Աթաջանյանն ընդունեց Ռուսաստանի Դաշնության Վոլգոգրադի մարզի մի խումբ հայ եւ ռուս երիտասարդների, ովքեր ԼՂՀ են ժամանել «Ուղեւորություն դեպի Հայաստան» նախագծի շրջանակներում: Նախագծի ծրագրային տնօրեն, Վոլժսկի քաղաքում «Ռուսստանի հայերի միության» ներկայացուցչության ղեկավար Հրաչյա Ներսիսյանը նշեց, որ այցի նպատակն է ծանոթանալ Հայաստանի եւ Արցախի հոգեւոր եւ պատմամշակութային արժեքներին, բարձրացնել երիտասարդության մտավոր ներուժի մակարդակը, նրա հոգեւոր-բարոյական եւ հայրենասիրական դաստիարակությունը, կապեր հաստատել հայրենակիցների հետ: Հյուրերի խնդրանքով Վասիլի Աթաջանյանն անդրադարձավ ղարաբաղյան ազգային-ազատագրական շարժման հիմնական փուլերին, ադրբեջանա-ղարաբաղյան հակամարտության կարգավորման բանակցային գործընթացում առկա ներկա իրավիճակին, հանրապետության ժողովրդագրական իրավիճակին եւ այլ հարցերի: Վասիլի Աթաջանյանը կարեւորեց նման այցերը Հայաստան-Արցախ-Սփյուռք եռամիասնության ամրապնդման գործում: Նախագծի կազմակերպիչները տեղեկացրին, որ ապագայում եւս կշարունակվեն այցերը ԼՂՀ, որոնց կմասնակցեն ավելի մեծ թվով երիտասարդներ:

---