ԷԴ. ԹՈՓՉՅԱՆ. ԴԱՍԱԿԱՆ ԵՐԱԺՇՏՈՒԹԵԱՆ ՊՐՈՊԱԳԱՆԴՈՒՄԸ
ԱՆՀՐԱԺԵՇՏՈՒԹԻՒՆ Է ԵՎ ՊԷՏՔ Է ԿԱՏԱՐՈՒԻ ՊԵՏԱԿԱՆ ՄԱԿԱՐԴԱԿՈՎ
09-05-2007 20:10:00 | Հայաստան | Մշակոյթ
ԵՐԵՎԱՆ, 9 ՄԱՅԻՍԻ, ՆՈՅԵԱՆ ՏԱՊԱՆ: Հայաստանում դասական
երաժշտութեան նկատմամբ չկայ պատշաճ ուշադրութիւն, հասարակութեան
մեծամասնութիւնն այժմ գերադասում է էստրադայինը, ինչը դասական
արուեստի վատ պրոպագանդման արդիւնք է: Այսպիսի տեսակէտ յայտնեց
Հայաստանի ֆիլհարմոնիկ նուագախմբի գեղարուեստական ղեկավար, դիրիժոր
Էդուարդ Թոփչյանը մայիսի 9-ին կայացած ասուլիսում:
Դիրիժորը համոզուած է, որ դասական արուեստը ներկայացնող այսօրուայ
շնորհաշատ երաժիշտները դեռեւս խորհրդային ժամանակաշրջանում
կրթութիւն ստացած մասնագէտներն են, ովքեր պահպանում են նախկին
աւանդոյթները եւ իրենց երգարվեստով յայտնի են նաեւ միջազգային
ասպարէզում: Ըստ դիրիժորի, դասական երաժշտութեան պրոպագանդումը
պէտք է սկսուի նախ ընտանիքից` դեռահաս տարիքում կրթութեան միջոցով
երեխայի մէջ սերմանելով սէր դէպի այդ արուեստը, իսկ հանրութեան
շրջանում պրոպագանդումը պիտի կատարուի նաեւ հեռուստատեսութեան
միջոցով:
Միաժամանակ, Էդ. Թոփչյանը գոհունակութիւն յայտնեց մի շարք
հեռուստաալիքների` բարձրաճաշակ դասական երաժշտությանը նուիրուած
հաղորդումների կապակցութեամբ:
«Ստեղծուած իրավիճակը կհարթվի միայն պետական մակարդակով: Ես
պատրաստւում եմ այդ հարցով դիմել ՀՀ վարչապետ Սերժ Սարգսեանին,
որպէսզի նրա ուշադրութեան եւ աջակցութեան շնոհիվ կարողանանք
պահպանել ունեցած արժէքները»,- յայտարարեց Էդ.Թոփչյանը: Նա նշեց, որ
իր գլխաւորած 120 հոգանոց նուագախումբն այսօր մեծ յաջողութիւններ
ունի եւրոպական շատ երկրներում եւ հիանալի համերգներ է ունենում
աշխարհի յայտնի բեմերում: «Մինչդեռ այսօր մեր խնդիրը մեր երկրում
հիանալի կատարումներով հանդէս եկող նուագախմբերի, երգչախմբերի
նկատմամբ ակնկալուող ուշադրութիւնն ու բարձրորակ երգարվեստ
ձեւաւորելն է»,- նշեց նա:
Էդ.Թոփչյանն անդրադարձաւ նաեւ երաժիշտների ցածր
աշխատավարձերին, նշելով, որ պետական բիւջէից ֆիլհարմոնիկ
նուագախմբի մէկ երաժշտին ամսական տրամադրւում է ընդամէնը 25 հազար
դրամ: Նուագախմբին արդէն 16 տարի հովանաւորում է Հայկական
բարեգործական ընդհանուր միութիւնը` ի դէմս Լուիս Սիմոն
Մանուկեանի: Նրա կարծիքով, երաժշտի նուազագոյն աշխատավարձը պէտք է
լինի մօտ 600 ԱՄՆ դոլարին համարժէք գումար, որպէսզի նա կարողանայ
յոգալ գոնէ իր առօրեայ ծախսերը:
Խօսելով առաջիկայ խորհրդարանական ընտրութիւնների նկատմամբ իր
վերաբերմունքի եւ քաղաքական այս կամ այն ուժին սատարելու մասին,
Էդ. Թոփչյանը նշեց, որ «քաղաքականութեամբ չի հետաքրքրւում, քանի որ
իր առաքելութիւնը երաժշտությամբ զբաղվելն է»: Երիտասարդ դիրիժորը,
չի ընդունում նաեւ մշակոյթային գործիչների` «քաղաքականութեամբ
տարվելը»: «Ամէն մէկն իր գործով պէտք է զբաղվի. մշակոյթ կերտող
մարդիկ չպէտք է ներկայանան քարոզարշավներին եւ կուսակցական դառնան,
որքան էլ դա նպաստաւոր եւ շահութաբեր լինի իրենց աշխատանքին»,-
ընդգծեց նա:
Երաժիշտն աւելացրեց նաեւ, որ առաջիկայում Հայաստանի
ֆիլհարմոնիկ նուագախումբը երկու մեծ համերգներ կունենայ Աուստրիայում,
որոնց պատճառով էլ չի կարողանայ մասնակցել մայիսի 12-ին կայանալիք
ԱԺ ընտրութիւններին: