Հայաստանում սպառողական գների 12-ամսեայ աճը կազմել է 1%
31-03-2009 19:00:00 | Հայաստան | Տնտեսութիւն
ԵՐԵՎԱՆ, 31 ՄԱՐՏԻ, ՆՈՅԵԱՆ ՏԱՊԱՆ: Հայաստանում սպառողական
գների ինդեքսը 2009թ.-ի մարտին 2008թ.-ի դեկտեմբերի համեմատ կազմել
է 100,7%, այդ թւում` պարենային ապրանքներինը (ներառեալ ոգելից
խմիչք եւ ծխախոտ) 100,3%, ոչ պարենային ապրանքներինը` 101,4%, իսկ
ծառայութիւնների սակագներինը` 101%:
ՀՀ Ազգային վիճակագրական ծառայութեան տուեալներով, 2009թ.-ի
մարտին 2008թ.-ի մարտի համեմատ սպառողական գների ինդեքսը կազմել է
101%, այդ թւում` պարենային ապրանքներինը (ներառեալ ոգելից խմիչք
եւ ծխախոտ)` 97,3%, ոչ պարենային ապրանքներինը` 100,5%,
ծառայութիւնների սակագներինը` 108,5%, իսկ յունուար-մարտին
2008թ.-ի յունուար-մարտի համեմատ, համապատասխանաբար, 102%, 99%,
98,6% եւ 109,6%:
2009թ.-ի փետրուարին ՀՀ սպառողական շուկայում արձանագրուած 1,8%
գնանկմանը մարտին յաջորդել է 1,4% գնաճ: Պարենային ապրանքների
(ներառեալ ոգելից խմիչք եւ ծխախոտ) գները նշուած ժամանակահատուածում
աճել են 1%-ով, ոչ պարենային ապրանքներինը` 3,7%-ով, իսկ
ծառայութիւնների սակագները` 1%-ով:
2009թ.-ի մարտին 2005թ.-ի համեմատ սպառողական գների ինդեքսը
կազմել է 118,9%, այդ թւում` պարենային ապրանքներինը (ներառեալ
ոգելից խմիչք եւ ծխախոտ)` 120,4%, ոչ պարենային ապրանքներինը`
106,7%, ծառայութիւնների սակագներինը` 122,9%:
Մարտի 3-4-ին, արժոյթային շուկայում փոխարժեքների կտրուկ
փոփոխութեան պահին, Երեւանի եւ հանրապետութեան դիտարկուող միւս
բնակավայրերի սպառողական շուկաներում, տեղի ունեցան որոշ
ապրանքատեսակների շուկայական գների էական տատանումներ (մինչեւ
30%): Որոշ ապրանքատեսակների գծով գնաճի գագաթնակէտերը մարտի 10-ին
մասնակի մարուեցին, ինչի հետեւանքով միջին ամսական գների եւ
սպառողական գների ինդեքսի հաշուարկներում այդ գագաթնակետերն
ամբողջութեամբ իրենց արտացոլումը չգտան, քանզի, ըստ գործող
մեթոդաբանության, սպառողական զամբյուղի 470 անուանում
ապրանք-ծառայութիւնների գների դիտարկումը իւրաքանչիւր ամիս
իրականացւում է 3 անգամ` նախորդ ամսուայ վերջին աշխատանքային օրը,
հաշուետու ամսուայ 10-ին եւ 20-ին, կամ դրանց մօտակայ աշխատանքային
օրերին, եթէ ամսի 10-ը եւ 20-ը աշխատանքային օրեր չեն: Մարտ ամսուայ
համար դիտարկման օրեր են եղել փետրուարի 27-ը, մարտի 10-ը եւ 20-ը:
Սպառողական գների ինդեքսի հաշուարկման համար դիտարկուող 470 անուանում
ապրանք-ծառայութիւններից 64-ը 2009թ.-ի մարտի 20-ին փետրուարի 27-ի
համեմատ ունեցել են 5 եւ աւելի տոկոս գնաճ, այդ թւում` 35-ը` աւելի
քան 10% գնաճ: Դրան զուգահեռ, 97 անուանում ապրանք-ծառայութիւնների
գները մնացել են անփոփոխ, իսկ 75-ի գծով արձանագրուել է գնանկում`
մինչեւ 22,2%:
Դիտարկուող 470 անուանում ապրանք-ծառայութիւններից 55-ը, որոնք
սպառողական զամբյուղում ունեն 16,07% տեսակարար կշիռ, 2009թ.-ի
մարտին փետրուարի համեմատ ունեցել են 9,9% ընդհանուր գնաճ, որոնց
ազդեցութիւնը սպառողական գների ինդեքսի վրայ կազմել է 1,64%: Առանց
վերը նշուած ապրանքատեսակների գնային փոփոխութիւնների սպառողական
գների ինդեքսը նշուած ժամանակահատուածում հանրապետութիւնում
արձանագրուած 101,4%-ի փոխարէն կկազմեր 99,8%: Միաժամանակ, 12
անուանում ապրանքատեսակների գծով, որոնք սպառողական գների ինդեքսի
(ՍԳԻ) զամբյուղում ունեն 3,82% տեսակարար կշիռ, արձանագրուել է
13,4% ընդհանուր գնանկում, ինչի ազդեցութիւնը ՍԳԻ-ի վրայ կազմել է
0,6%:
2009թ.-ի մարտի 20-ին հանրապետութեան դիտարկուող
բնակավայրերում հացամթերք խմբից բրնձի, լոբու, ոսպի, սիսեռի, ոլոռի
արձանագրուած առաւելագոյն գների յարաբերակցութիւնը փետրուարի 27-ին
արձանագրուած նուազագոյն գների համեմատ (գնաճը) տատանուել է
45,9-72,4%-ի միջակայքում: Բուսական յուղինը, հալած յուղինը, պանրի
որոշ տեսակներինը, մայոնեզինը, լուծւող սուրճինը,
համապատասխանաբար, 22,8%-47,3%, շաքարավազինը` 33,3 %,
դեղորայքինը` մինչեւ 2 անգամ: