Մհեր Իսրայելյանի «Մեն ու միակ մոլորակ» գիրքը կներկայացվի ընթերցողին
19-08-2021 18:00:00 | Հայաստան | Շնորհանդես
Արձակագիր Մհեր Իսրայելյանի նոր՝ «Մեն ու միակ մոլորակ» ժողովածուն կներկայացվի ընթերցողին։ Օգոստոսի 19-ին, ժամը 18:00 «Մետաքսի Ճանապարհ» հյուրանոցում կկայանա գրքի շնորհանդեսը։ Գիրքը հրատարակել է «Անտարես»-ը՝ XXI-ի մատենաշարով:
Շնորհանդեսի ընթացքում կանցկացվի նաև Հայաստանի Հանրապետության վաստակավոր նկարիչ Արմեն Վահրամյանի նկարների ցուցահանդեսը: Ի դեպ, նրա «Միստիկա» նկարը Մհեր Իսրայելյանի նոր գրքի շապիկին է:
Նշենք, որ Մհեր Իսրայելյանի նոր ժողովածուի պատմվածքները մարդու մասին են։ Պարզապես մարդու, որ ծնվում է ու մեռնում, որ ծիծաղում է և լաց լինում, որ ճաշակում է պատերազմի դառնահամն ու ըմբոշխնում խաղաղության բերկրանքը։ Հայաստանը սիրո կարոտ մեր փոքր հայրենիքն է, Երկիր մոլորակը՝ մեծ հայրենիքը։ Մարդկությանը միավորում է խաղաղ ու իմաստալից ապրելու երազանքը՝ այն մեն ու միակի վրա, որ պտտվում և դեռ երկար շարունակելու է պտտվել:
Գիրքը նվիրված է շարքային Վարդան Ամալյանին, որ պիտի գրող դառնար, և Արցախի համար անմահացած բոլոր տղաներին ու աղջիկներին:
ՀԱՅԵՐԵՆ
Русский
English
Դաս. հայերեն
French
