ԵՐԵՎԱՆ, 2 ՓԵՏՐՎԱՐ, ՆՈՅՅԱՆ ՏԱՊԱՆ: Ի պաշտպանություն Հայաստանում օրինականության հաստատման նորաստեղծ Ազգային խորհրդի ներկայացուցիչ Ռաֆայել Ղազարյանը հայտնեց, որ ներկայումս ԱԽ-ում տեղի են ունենում խորհրդի կազմի ընդլայման նպատակով նոր թեկնածությունների վերաբերյալ քննարկումներ, ճշտվում են չափանիշները, որոնցով պետք է ընդգրկվեն նոր անդամները: Կազմավորվելու է ավագանի, որի անդամներին ժողովուրդը վստահում է, որոնք վարկաբեկված չեն եւ պաշտոնների չեն հավակնում: ԱԽ-ի առաջնահերթ նպատակներից է «հարթեցնել այն սեպերը, որոնք գոյություն ունեն քաղաքական խմբավորումների միջեւ, եւ հասնել համազգային համախմբման», ինչպես նաեւ «հանցավոր խմբավորման հեռացումն իշխանությունից, իրավիճակի կայունացումը եւ նոր, արդար ու ժողովրդավարական ընտրությունների նախապատրաստումը»: Ազգային խորհրդի ներկայացուցիչներին, ըստ Ռ.Ղազարյանի, շատ է ոգեւորում «Երկրապահ» կամավորականների դիրքորոշումը, որոնք աջակցում են ԱԽ-ին եւ, հնարավոր է, անհրաժեշտության դեպքում կօգնեն ամբիոն ստանալ Ազգային ժողովում հաղորդումների, կոչերի եւ հայտարարությունների համար: «Ներկայումս ամենակարեւորը ժողովրդի ակտիվությունն է, որն անպայման պետք է արտահայտի իր կամքը, աջակցի բոլոր առողջ ուժերին, որոնք ձգտում են երկիրը վերադարձնել դեպի առողջացում` բարոյական, տնտեսական, սոցիալական, եւ ամենակարեւորը` Արցախի հարցը լուծել ճիշտ հունով»: Միաժամանակ, Ռ.Ղազարյանը բնակչությանը կոչ արեց զգուշանալ սադրանքներից, չընդառաջել իրավիճակի ապակայունացման նպատակով քայլեր ձեռնարկելու կոչերին եւ խուսափել ժողովրդական հուզումներ հարուցող ձեռնարկներից:

---