ԵՐԵՎԱՆ, 4 ՀՈՒՆԻՍԻ («ՆՈՅՅԱՆ ՏԱՊԱՆ»): Բնապահպանության հիմնախնդիրներից մեկը ծանր մետաղների աճող ազդեցությունն է շրջակա միջավայրի վրա: Օրգանիզմում մետաղների կուտակման ընդունակության հետեւանքով մուտագենային եւ քաղցկեղածին էֆեկտները կարող են արտահայտվել տարիներ անց: Ամենավտանգավոր հետեւանքներից մեկը ծանր մետաղների ազդեցությունն է սաղմի վրա` պատճառ դառնալով խանգարումների, վիժումների, կամ պտղի մահվան: Ինչպես հաղորդեց ՀՀ ԳԱԱ բնապահպանական-նոոսֆերային հետազոտությունների կենտրոնի տնօրեն Արմեն Սաղաթելյանը, կենտրոնի գիտնականները կազմել են Երեւանի բնապահպանական-երկրաքիմիական քարտեզները, որտեղ ցույց է տրվում ծանր մետաղների խտության տարաբաշխումը 125 քառ. կմ մակերեսի վրա: Պերինատալ մահացության բժշկական տվյալների հետ այս տվյալները համադրելիս բացահայտվել է մահացության ցուցանիշի եւ շրջակա միջավայրում պղնձի ու արճճի պարունակության միջեւ լիակատար համահարաբերակցություն: Ա.Սաղաթելյանը նշեց, որ նման ուսումնասիրությունները պետք է լինեն հիմնարար քաղաքի կառուցապատումը ծրագրավորելիս եւ սանիտարա-առողջաբանական վերահսկողության համար: Նրա խոսքերով, Երեւանի բնակելի շատ զանգվածներ վատ են օդափոխվում եւ հայտնվում են արտադրությունների վնասակար արտանետումների միագումարման գոտում: Ըստ վնասակար արտանետումների վտանգավորության, որոնք պարունակում են նաեւ ծանր մետաղներ, առաջին կատեգորիայի ձեռնարկությունների մեջ Երեւանում առաջին տեղը զբաղեցնում է ՋԷԿ-ը: Բացի նրանից, առաջին քառյակի թվում են լամպերի գործարանը, քիմմաքրման «Արաբկիր» ձեռնարկությունը եւ «Նաիրիտ» ԳԱՄ-ը: Ա.Սաղաթելյանի խոսքերով, շրջակա միջավայրի կառավարման այլընտրանքային մեթոդներից մեկը, որոնք թույլատրում են նվազեցնել օրգանիզմի վրա վնասակար ազդեցությունները, քաղաքի ֆունկցիոնալ կանաչապատումն է: Կենտրոնում առաջարկվել է կանաչապատման այնպիսի սխեմա, որն ընդունակ է 40 տոկոսով փոքրացնել արտանետումների վնասակար հետեւանքները դրանց առավել խտացման շրջաններում:

---