ՍԱՐԱԵՎՈ, հունվ 24 (ՆՏ-AFP) Մարդու իրավունքների գծով ԱՄՆ Պետքարտուղարի օգնական Ջոն Շատակը երեքշաբթի օրը հրապարակայնորեն հանդիմանել է Բոսնիայի նախկին պատերազմող կողմերին գերիների ազատման հետ կապած պարտավորությունները չկատարելու համար: Նախագահ Ալիյա Իզեթբեգովիչի հետ ունեցած զրույցից հետո Շատակն ասել է, որ ինքը նախագահին հայտնել է, որ «բոլոր կողմերը պարտավորությունները չեն կատարել գերիների ազատման հարցում, եւ բոլոր գերիները պարտադիր պիտի ազատվեն»: նրա խոսքերով, ինքը նախագահ Իզեթբեգովիչին ԱՄՆ-ի կողմից խոր հիասթափություն է հայտնել այն բանի կապակցությամբ, որ գերիները դեռեւս ազատված չեն: «Նախագահն ինձ հավաստիացրեց, որ ինքը կշարունակի գերիների ազատումը» - ասաց նա: Սերբական նախագահ Սլոբոդան Միլոշեւիչը նախորդ օրը խոստացել էր ճնշում գործադրել բոսնիական սերբերի վրա, որպեսզի նրանք լիակատար ազատություն տան իրենց բոլոր գերիներին: Բոսնիական իշխանությունները, խախտելով անցած ուրբաթ օրը նշանակված գերիների ազատման վերջնաժամկետը, դադարեցրեն են նրանց հետագա ազատ արձակումը` բոսնիական սերբերից պահանջելով տհեղեկություններ հազարավոր անհայտ կորած մուսուլմանների մասին: ԱՄՆ-ի կողմից միջնորդավորված բոսնիական այդ խաղաղասիրական համաձայնագրով որոշված վերջնաժամկետում ազատվել են ամբողջությամբ վերցված 217 գերի, բայց առնվազն 645-ը դեռեւս մնում են գերության մեջ: Ամերիկյան դիվանագետը քննարկել է այն հարցը, թե ինչ օգնություն պետք է ցուցաբերեն խաղաղությունն իրականացնող ուժերը պատերազմի հանցագործների հետաքննության հարցում, որի ընթացքում մանրամասնորեն կքննարկվեն հազարավոր խաղաղ մարդկանց դեմ իրականացված մասսայական կոտորածի հետ կապված հարցերը: Շատակը պատրաստվում է մեկնել նաեւ արեւելյան Բոսնիայում գտնվող Սրեբրենիցա շրջանը, որի առնվազն 7000 քաղաքացիների ճակատագրեր դեռեւս մնում են անհայտ այն ժամանակվանից, երբ անցած հուլիսին այդ մուսուլմանական անկլավը գրավվեց սերջերի կողմից:

---