ԲԱՔՈՒ, 18 հունվարի («ՆՈՅՅԱՆ ՏԱՊԱՆ»): Ադրբեջանի արտաքին գործերի նախարար Հ.Հասանովը Վրաստանի արտաքին գործերի նախարար Իրակլի Մենաղարիշվիլու Բաքու կատարած այցը գնահատել է իբրեւ երկու երկրների միջեւ հատուկ հարաբերությունների արտահայտություն: Համաշխարհային հանրակցության մեջ երկու երկրների ինտեգրացմանը խանգարող ընդհանուր հիմնախնդիրները` ներքին հակամարտություններն ու անջատողականության դրսեւորումները լուծելու համար, Հ.Հասանովի կարծիքով, անհրաժեշտություն է առաջացել մեծացնելու երկկողմ քաղաքական խորհրդատվությունների ինտենսիվությունը: Ադրբեջանի արտաքին քաղաքական գերատեսչության ղեկավարը նաեւ կարեւորել է Ադրբեջանի եւ Վրաստանի ջանքերի համաձայնեցումը եվրոպական այնպիսի կազմակերպությունների մեջ ինտեգրացվելու ուղղությամբ, ինչպիսին են` «Համագործակցություն հանուն խաղաղության»-ը, Հյուսիս-ատլանտյան համագործակցության խորհուրդը եւ Եվրոպայի խորհուրդը:

---