ՉԵՉԵՆՆԵՐԻ ՀԵՏ ՎԵՐՍԿՍՎԵԼ ԵՆ ԲԱՆԱԿՑՈՒԹՅՈՒՆՆԵՐԸ ՊԱՏԱՆԴՆԵՐԻՆ
ԱԶԱՏԵԼՈՒ ՀԱՐՑՈՎ
12-01-1996 14:30:00 | Հայաստան | Միջազգային
ՄՈՍԿՎԱ, 12 հունվարի (ՆՏ-AFP): Այսօր վաղ առավոտյան Դաղստանի
Պերվոմայսկայա գյուղի մոտ վերսկսվել են պատանդներին ազատելու
բանակցությունները ռուսական իշխանությունների եւ չեչեն
անջատողականների միջեւ: Չեչենական կողմն իր մոտ առնվազն 160 պատանդ
է պահում: Գիշերվա ընթացքում ռուսական տանկերով կրկնակի շրջապատված
գյուղի մոտ ոչ մի պատահար չի արձանագրվել:
28 կանայք եւ ամենափոքրը` 12 տարեկան երեխաներ են եղել
տանկերի դեմ դուրս բերված «կենդանի վահանի» կազմում: Պատանդ կանայք
եւ երեխաները գիշերն անց են կացրել գյուղի դպրոցում եւ մզկիթում:
Տղամարդիկ մնացել են ավտոբուսներում: Չեչենները ցանկանում են
անվնաս անցնել Չեչնիայի սահմանը եւ հասնել Նովո-Գրոզնի գյուղ,
որտեղից նաեւ ռուսական վերահսկողությունից դուրս գտնվող վայրեր: Ի
պատասխան նրանք խոստանում են ազատ արձակել պատանդների մի մասին`
ներառյալ կանանց եւ երեխաներին:
Հինգշաբթի օրն այդտեղ է ժամանել Ռուսաստանի Անվտանգության
ծառայության ղեկավարի տեղակալ Վիկտոր Զորինը:
Չեչեն ահաբեկիչների ղեկավար Սալման Ռադուեւը Ռուսաստանի NTV
հեռուստակայանին հայտնել է, թե իրենք կկռվեն մինչեւ վերջին
փամփուշտը, եթե ռուսները չընտրեն հարցի խաղաղ լուծման ճանապարհը:
Հինգշաբթի օրը ուշ երեկոյան Ռադուեւն առաջարկել է, որ իր հետ
բանակցություններ վարելու գան չորս աչքի ընկնող ռուս քաղաքագետներ,
որոնք դեմ են չեչենական պատերազմին: Նա նաեւ պահանջել է, որ իրենց
շարասյունն ուղեկցեն արտասահմանյան լրագրողներ եւ միջազգային
Կարմիր խաչի կամ «Բժիշկներ առանց սահմանի» կազմակերպությունների
ներկայացուցիչներ: