Հունվ. 10 (ՆՏ-AFP) ԱՄՆ-ի արեւելյան մասում, որտեղ անցել է վերջին 70 տարվա ամենադաժան ձնաբուքը, աստիճանաբար բացվում են հիմնական մայրուղիները եւ օդանավակայանները, սակայն կառավարական աշխատողներն արդեն երրորդ օրն է, որ ստիպված դուրս չեն գալիս աշխատանքի: Ձնաբքի պատճառով զոհվել է 63 մարդ, որոնց մեծ մասը` ճանապարհային պատահարներում, իսկ մի որոշ մասն էլ` սրտի նոպաներից, երբ բահով իրենց համար ճանապարհ էին մաքրում: Փրկարար ուղղաթիռները ուտելիք եւ ծածկոցներ են նետել Վիրջինիա նահանգի Շենանդո ազգային զբոսայգում ձյուների մեջ մնացած երեք խումբ մարդկանց: Նոր ձյուն է տեղացել Վաշինգտոնում կեսօրին` մի նոր շերտ ավելացնելով 45սմ-ոց ձյան ծածկոցին: Չորեքշաբթին արդեն երկրորդ օրն է, որ դաշնային կառավարությունը Վաշինգտոնում դեռեւս փակ է եղանակի պատճառով, սակայն դրան նախորդել է 21 օր տեւած աշխատանքների մասնակի դադարեցում, որը տեղի է ունեցել ԱՄՆ-ի բյուջեի հետ կապված քաղաքական վիճաբանության պատճառով: Մայրաքաղաքում եւ դրա շուրջն ընկած խոշոր ճանապարհներ արդեն բացվել են երթեւեկության համար, բայց շատ երկրորդական ճանապարհներ դեռեւս ծածկված են ձյան հաստ շերտով: Նյու Յորքի ֆինանսական շուկաները մեկօրյա խափանումից հետո նորմալ են գործում: Երկօրյա կաթվածից հետո վերականգնվել է փոստի աշխատանքը:

---