Երբ խոսքը վերաբերում է մարդու իրավունքներին, մենք, երբեմն, մոռանում ենք, թե ինչքան շատ պարտավորություններ ունենք այլ անձանց հանդեպ. հարյուր հազարավոր այն չգնահատված հերոսների հանդեպ, որոնք հայտնի են որպես մարդու իրավունքների պաշտպաններ: Նրանք փոխել են պատմությունը, գործ ունեցել անարդարության եւ խտրականության հետ, որտեղ որ հայտնաբերել են: Նրանց անուններից մի քանիսը կարող են ծանոթ լինել Ձեզ` Էմմելին Պանքհուրստ, Մահաթմա Գանդի, Մարտին Լյութեր Քինգ, Նելսոն Մանդելա, Ռիգոբերտա Մենչու: Բայց նրանց մեծ մասն ընդհանրապես հայտնի չէ աշխարհում: Նրանք իշխաններ ու քաղաքագետներ են, տարբեր բնագավառներ ներկայացնող կանայք ու տղամարդիկ: Մի մասը` հարուստ է, մյուս մասը` աղքատ, ոմանք ինտելեկտուալ են, մյուսները` հազիվ գրաճանաչ: Այս գործի համար ձեւական որակավորում չի պահանջվում: Մենք բոլորս կարող ենք եւ պետք է լինենք մարդու իրավունքների պաշտպաններ: Այն ընդամենը պահանջում է նվիրվածություն եւ խիզախություն: Ամեն տարի մարդու իրավունքների հազարավոր իրավապաշտպաններ են հալածվում, շահագործվում, անարդարացիորեն բանտարկվում եւ սպանվում: Հաճախ նրանց ընտանիքները նույնպես թիրախ են հանդիսանում: Ահա թե ինչու Մարդու իրավունքների օրն այս տարի նվիրված է մարդու իրավունքների պաշտպաններին եւ խտրականության դեմ նրանց հիանալի պայքարին: Մենք պետք է պաշտպան կանգնենք նրանց իրավունքներին, որ նրանք էլ շարունակեն պաշտպանել մերը:

---