Ընդդիմության ներգրավվածությունն ու ընդդիմադիրների չափաբաժնի մեծացումը կհանգեցնի քաղաքական գործընթացի ինտեսիվության ու սրության: HayNews.am-ի հետ զրույցում այս մասին հայտնեց քաղաքագետ Հրանտ-Մելիք Շահնազարյանը։ Վերջինս նշեց, որ խորհրդարանի հետ կապված իր սպասելիքները ժողովրդավարության ու բովանդակային մակարդակի բարձրացումներն են. «Այս խորհրդարանում պրոֆեսիոնալիզմն ավելի բարձր կլինի, եթե աշխատանքների հանդեպ հետեւողականությունը բարձրանա»: Այն հարցին, թե ընդդիմադիրների չափաբաժնի մեծացում ասելով, քաղաքագետը, ո՞ր քաղաքական ուժերին նկատի ունի, Հրանտ-Մելիք Շահնազարյանը պատասխանեց. «Նկատի ունեմ նաեւ ԲՀԿ-ին, քանի որ այս կուսակցությունը ընդդիմություն դառնալու լուրջ պոտեցիալ ունի: Իսկ իշխանության դաշտում միայն ՀՀԿ-ն ու ՕԵԿ-ն են, մնացած կուսակցություններն ընդդիմություն են»: Անդրադառնալով ԲՀԿ հետագա դիրքորոշմանը քաղաքագետը նշեց, որ ԲՀԿ-ն որպես քաղաքական միավոր ինքնաբավ չէ. «Հնարավոր է, որ ԲՀԿ-ն բռնի իշխանության ուղին, հետ գնա իշխանություն: Բայց հիմա ԲՀԿ-ն ընդդիմություն է: Եթե ԲՀԿ շահերը որեւէ դրության ժամանակ չբավարարվեն, ԲՀԿ-ն կվերադառնա կոալիցիա»: ՀՀ երկրորդ նախագահ Ռոբերտ Քոչարյանի վերադարձը քաղաքականություն եւ ԲՀԿ նախագահական ընտրություններին թեկնածու առաջադրվելու տարբերակը հավանական համարո՞ւմ եք հարցին ի պատասխան, քաղաքագետն ասաց, որ Ռոբերտ Քոչարյանի առաջադրումը որպես նախագահի թեկնածու քաղաքական պահանջարկ չի ունենա:

---