Այսօր «Էրեբունի» պատմահնագիտական արգելոց-թանգարան է այցելել «Ալյանս ֆրանսեզ»-ի գլխավոր քարտուղար Ժան-Կլոդ Ժակը` ՀՀ-ում Ֆրանսիայի դեսպանության Մշակույթի եւ համագործակցության հարցերով խորհրդական Ժան-Միշել Գասպարյանի ուղեկցությամբ: Ծանոթանալով թանգարանի մշտական ցուցադրությանը պատվավոր հյուրը թողել է հետեւյալ գրառումը. «Անչափ երջանիկ եմ, որ առիթ ունեցա բացահայտել Ուրարտուի քաղաքակրության հարստությունը, որից ծնվել է այսօրվա Հայաստանը»: «Էրեբունի» պատմահնագիտական արգելոց-թանգարանից հայտնում են, որ հյուրերը դիտել են նաեւ վերջին օրերին թանգարանում բացված «Ճանապարհ. Էրեբունին երեկ եւ այսօր» ժամանակավոր ցուցահանդեսը, որը ներկայացնում է Էրեբունի քաղաք-ամրոցի բացահայտման գիտական ճանապարհը` 50-ականներից մինչեւ հայ-ֆրանսիական համագործակցություն: Այցելությունն ավարտվել է Արին բերդ բլրին պահպանված Էրեբունի ամրոցի միջնաբերդում շրջայցով:

---