Ընթերցողի սեղանին է Վազգեն Սաֆարյանի «Գրականության բազմաձայնությունը» ժողովածուն
18-12-2012 17:14:01 | Հայաստան | Նոր գրքեր
Օրերս լույս տեսավ Վազգեն Սաֆարյանի «Գրականության բազմաձայնությունը» ժողովածուն: Այն իր մեջ ներառում է հեղինակի մի քանի տասնյակ տարիների ընթացքում տպագրած հոդվածները:
Վազգեն Սաֆարյանը հրատարակել է 50-ից ավելի գիտական հոդվածներ, ինչպես նաև հետևյալ մենագրությունները ` «Փավստոս Բուզանդի «Հայոց պատմության» թեմաները հայ նոր գրականության մեջ», «Կիլիկյան Հայաստանի գրականությունը», «Միջնադարի հայ գրականության պարբերացման հիմունքները» և «Գրականության բազմաձայնությունը» հոդվածների ժողովածուն, որտեղ ամփոփված գործերը ներկայացնում են ոչ միայն գրականության տարբեր շրջանների մշակութային դիմապատկերը, այլև այդ շրջանակներում ազգի գոյապահպանության բնորոշ որակները:
1970 թվականին ԵՊՀ-ի բանասիրական ֆակուլտետը գերազանց ավարտելուց հետո Վազգեն Սաֆարյանը եղել է հայ գրականության ամբիոնի ասպիրանտ, այնուհետև նույն ամբիոնում աշխատել է որպես դասախոս: 1993 թվականից ամբիոնի պրոֆեսոր է: 1974 թվականին պաշտպանել է թեկնածուական, իսկ 1992-ին` դոկտորական ատենախոսություններ: Դասավանդում է միջնադարի և 19-րդ դարի երկրորդ կեսի հայ գրականության պատմություն: Նրա գրտական հետաքրքրությունների շրջանակներում են հին, նոր և նորագույն շրջանի այն հեղինակները, որոնք մշակութա – ազգաբանական անցումային որակների կրողներն են: Դրա հաստատումն են Մովսես Խորենացու, Գրիգոր Նարեկացու, Խաչատուր Աբովյանի, Եղիշե Չարենցի, Հրանտ Մաթևոսյանի և այլ նշանավոր դեմքերի մասին ուսումնասիրությունները, տեղական և միջազգային գիտաժողովներում կարդացած զեկուցումները: