Սույն թվականի նոյեմբերի 26-ին և 27-ին Բրյուսելում անց է կացվել «Արևելյան գործընկերության օրեր» համաժողովը, որի նպատակն էր Արևելյան գործընկերության հարթության վրա մշակութային քննարկումների նախաձեռնությունը: Վերոնշյալ համաժողովի ընթացքում մի ամբողջ օր, որը կրում էր «Ապագայի նվագախմբեր` ապագայի հասարակություն. ինչպես են 21-րդ դարի երիտասարդական նվագախմբերը նպաստում սոցիալական և մշակութային դրական փոփոխությունների իրականացմանը» խորագիրը, տրամադրվեց երիտասարդական նվագախմբերի ներկայացմանը, դրանց արդի խնդիրների քննարկմանը: Միջոցառմանը հրավիրված էին մասնակցելու Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը և Երևանի Կոմիտասի անվան պետական կոնսերվատորիայի ռեկտոր, պրոֆեսոր Շահեն Շահինյանը: Ունենալով ընդամենը 7 տարվա պատմություն` «պետական» կարգավիճակի արժանացած երիտասարդական նվագախումբը մեծ հետաքրքրություն է առաջացրել կազմակերպիչների շրջանակում, ինչը և հիմք է հանդիսացել հատուկ հրավերի համար: Որոշման կայացման վրա մեծապես ազդել են նվագախմբի պրոֆեսիոնալ աճի արագ տեմպերը և, հիրավի, կարճ ժամանակահատվածում ձեռք բերած նշանակալի նվաճումները: