Գիտաժողովի աշխատանքներին մասնակցեցին ՀՀ ԳԱԱ ակադեմիկոսներ Էդուարդ Ղազարյանը և Վանիկ Զաքարյանը, որոնց ներկայությունն առավել ընդգծեց գիտաժողովին ներկայացված զեկույցների կարևորությունն ու արդիականությունը, Կապանի քաղաքապետ Աշոտ Հայրապետյանը, Սյունիքում գործող երկու հանքարդյունաբերական ձեռնարկությունների` «Զանգեզուրի պղնձամոլիբդենային կոմբինատ» և «Դինո գոլդ մայնինգ քամփնի» ընկերությունների ներկայացուցիչներ:

ՀՊՃՀ ռեկտոր, պրոֆեսոր Արա Ավետիսյանը, ողջունելով գիտաժողովի մասնակիցներին և հյուրերին, նշեց, որ ներկայումս բարձրագույն մասնագիտական կրթությունը նոր փուլ է թևակոխում, և Հայաստանը գնում է գիտահենք տնտեսության կառուցման ճանապարհով: “Նոր տեխնոլոգիաների վրա հիմնված տնտեսությունը չի կարող գործել առանց ճարտարագիտական կրթության, քանի որ ճարտարագիտական կրթությունն է նորարարական տնտեսական զարգացման կարևոր բաղադրիչը և շարժիչ ուժը”,-ասաց ՀՊՃՀ ռեկտորը:

Կապանի մասնաճյուղի տնօրեն, ֆ.մ.գ.դ., պրոֆեսոր Լեռնիկ Պետրոսյանի խոսքով` նման գիտական ներկայացուցչական կազմով միջոցառում երբևէ չի անցկացվել մասնաճյուղում: Նրա բնորոշմամբ` ներկայումս ճարտարագիտական կրթության առջև լուրջ մարտահրավերներ կան, և ճարտարագետ-մասնագետներ պատրաստելու խնդիրը ոչ միայն հրատապ է Երևանում, այլև տարածաշրջանային մասնաճյուղերում: “Կապանի մասնաճյուղում, ինչպես մյուս տեխնիկական հաստատություններում, լաբորատոր հագեցվածության, որակյալ կրթության անդադար կատարելագործման խնդիր կա: Սրընթաց տեմպերով զարգացող տեխնոլոգիաները բարձրագույն ճարտարագիտական կրթություն մատուցող հաստատություններին ստիպում են կանգ չառնել ձեռք բերածի վրա: Եվ այս գիտաժողովը, որին մասնակցեցին ակադեմիկոսներ, պրոֆեսորներ, մասնաճյուղի դասախոսներ և ուսանողներ, ինչպես նաև` արտադրության կազմակերպիչներ, միտված էր կրթության կազմակերպման նոր ուղիների որոնմանը, առկա մասնագիտությունների բովանդակային և մեթոդական բաղադրիչների վերանայմանը, տարածաշրջանային հարցերի քննարկմանը և այլն”,-ընդգծել է Լ. Պետրոսյանը:

Երկու օրերի ընթացքում քննարկվեցին ճարտարագիտական կրթության արդի վիճակը, մարտահրավերներն ու հիմնախնդիրները, “մաթեմատիկա” և “ֆիզիկա” գիտությունների դրվածքը ճարտարագիտական բուհում, ճարտարագիտական հետազոտությունների կազմակերպման մեխանիզմներն ու աշխատանքները ՀՊՃՀ մասնաճյուղերում, հանքարդյունաբերական տնտեսության խնդիրները և դրանում Կապանի մասնաճյուղի` որպես ոլորտին կադրերով “սնող“ հաստատության դերակատարումը, ինչպես նաև “բուհ-արդյունաբերություն” համագործակցության ձևաչափը` կրթություն-աշխատաշուկա համագործակցության համատեքստում:

Գիտաժողովի արդյունքներն ամփոփելիս` հնչեցված բոլոր առաջարկների վերաբերյալ կազմկոմիտեի կողմից ՀՊՃՀ համապատասխան ստորաբաժանումների ղեկավարներին տրվեցին հանձնարարականներ, որոնք, բուհի ռեկտորատի ու գիտական խորհրդի հավանությանն արժանանալուց հետո, կներդրվեն ճարտարագիտական համալսարանի կրթական գործընթացում:

 

ՀՊՃՀ (Պոլիտեխնիկ), Հասարակայնության հետ

կապերի և տեղեկատվության բաժին

Վերոնիկա Խորասանյան

Տերյան 105, ք. Երևան, ՀՀ

(+374 10) 56 79 68,

(+374 77) 46 26 06

prg@seua.am

www.seua.am

 

Նոյյան տապան  -   Գիտություն եւ տեխնոլոգիաներ