Ղարաբաղյան հարցով պետք է մշակել մինիմալիստական սկզբունքով
կողմերի միջեւ համաձայնեցված կետերով փաստաթուղթ
11-02-2011 20:30:00 | Հայաստան | Քաղաքական
ԵՐԵՎԱՆ, 11 ՓԵՏՐՎԱՐԻ, ՆՈՅՅԱՆ ՏԱՊԱՆ: Լեռնային Ղարաբաղի խնդրի
կարգավորման բանակցային գործընթացի շրջանակում անհրաժեշտ է մշակել
որեւէ բազային փաստաթուղթ «մինիմալիստական սկզբունքով», որում
նշված կլինեն կողմերի միջեւ համաձայնեցված կետերն ու դրույթները:
Փետրվարի 11-ի ասուլիսում այսպիսի տեսակետ հայտնեց քաղաքագետ, ԱՊՀ
երկրների ինստիտուտի հայկական մասնաճյուղի տնօրեն Ալեքսանդր
Մարկարովը: Այդ առումով նա կարեւորեց Աստրախանի հանդիպումից հետո
զոհերի ու գերիների փոխանակման մասին ձեռք բերված համաձայնությունը
եւ կողմերի առաջարկները` դիպուկահարների ետքաշման ու ուժի
չկիրառման մասին: «Չնայած մենք հիշում ենք, որ ադրբեջանական կողմը
վերջին կետի նկատմամբ ցուցաբերել է մերժողական վերաբերմունք»,-
նկատեց քաղաքագետը:
Ա.Մարկարովը դրական է համարում, որ «գործընթացում առկա է
միջազգային ներգրավվածություն, բանակցությունների որոշակի թեմա, եւ
կարճաժամկետ հեռանկարում կողմերն ունեն ցանկություն ու քաղաքական
կամք` պահպանել այս բանակցային ֆորմատը, որն իր հերթին պետք է բերի
որոշակի արդյունքի: Դրական է նաեւ այն, որ կողմերը գոնե այս պահին
չեն պատրաստվում ռազմական գործողությունների: Իսկ բացասական կողմն,
ըստ քաղաքագետի, այն է որ «մենք այնքան էլ տեղյակ չենք
բանակցությունների մանրամասներին»: Այդ մասին է, ըստ նրա, վկայում
այն, որ ո'չ Երեւանում, ո'չ էլ Բաքվում ԵԱՀԿ Մինսկի խմբի
համանախագահները չեն պատասխանել լրագրողների հարցերին, չնայած
նախատեսվում էր հայտարարություն` Ադրբեջանի նախագահ Իլհամ Ալիեւի
հետ հանդիպումից հետո: