Հունիսի 29-ին Վիրահայոց թեմի «Հայարտուն»« կենտրոնի Գալուստ Գյուլբենկյան սրահում կայացավ Կենտրոնի Սբ. Մովսես Խորենացու անվան նախակրթարանի ավագ խմբի սաների ավարտական ցերեկույթը: Գեղեցիկ զարդարված դահլիճում տեղեր էին զբաղեցրել հոգևոր հայրերը, ուսուցիչներ, ծնողներ, հյուրեր, թբիլիսահայ հասարակայնության ներկայացուցիչներ:
Վահագն և Լուսինե Աֆյանների բարերարությամբ ձեռք բերված գեղեցիկ համազգեստով զուգված փոքրիկները «Տերունական աղոթքի» փայլուն արտասանությամբ բացեցին հանդեսը և Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանի օրհնությունը ստանալուց հետո ցուցադրեցին իրենց գիտեցածը և սովորածը: Ի տարբերություն նախորդ միջոցառումներին, ներկաներին ողջունեցին և ողջ հանդեսը վարեցին իրենք՝ շրջանավարտները, ում շուրթերից հնչած Այբ-բեն-Գիմը, գեղեցիկ արտասանությունն ու երգը,խրոխտ պարը վեր էր սպասվածից:
Սբ. Մովսես Խորենացու անվան նախակրթարանի 16 շրջանավարտներից տասը նոր ուսումնական տարին սկսելու են հայկական դպրոցներում! Թիվ 104 հայկական դպրոցի տնօրեն տիկին Իրինա Ժամկոչյանը, Վրաստանում ՀՀ դեսպանորդ պարոն Վահագն Աֆյանը արժևորեցին սաների պատրաստվածության մակարդակը և նախակրթարանի ուսուցիչների՝ տնօրեն Եվգենյա Մարկոսյանի, երգի, պարի դաստիարակչուհիներ Լալա Գևորգյանի, Նարինե Ղուշչյանի, հոգևոր տեսուչ Գևորգ սարկավագ Անտոնյանի ներդրումը՝ լավ սովորելու, իսկական հայ մեծանալու ամուր հիմք և մեծ կարողություն ստեղծելու գործում:
Վիրահայոց Թեմի «Հայարտուն» կենտրոնի բարերար, ռուսաստանաբնակ Բորիս Սաակովը, անթաքույց գոհունակությամբ ընդգծեց իր բարերարությամբ կառուցված «Հայարտուն» կենտրոնի ազգանվեր գործունեությունը, որտեղ մարդիկ ստանում են այն, ինչը իրենց հոգուն մոտ է ու հարազատ:
Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանն իր օրհնության խոսքում բարձր գնահատեց նախակրթարանի գործունեությունը, բարձրաճաշակ և շքեղ հանդեսները, որոնք վկայում են հայկական ոգով, հայ մշակույթի շնչով մանուկ սերնդի դաստիարակությանը նախակրթարանի ուսուցիչների նվիրվածության մասին:
«Հայարտուն» կենտրոնի հոգաբարձուների խորհրդի անդամ Նելսոն Պետրոսյանի տիկին Աննա Պետրոսյանը Սբ. Մովսես Խորենացու անվան նախակրթարանն ավարտելու վկայագրեր բաժանեց շրջանավարտներին, որից հետո երեխաները հյուրասիրվեցին տորթով:
Հավլաբարի «Սուրբ Էջմիածին» եկեղեցում Վիրահայոց Թեմի առաջնոորդ Գերաշնորհ Տեր Վազգեն եպիսկոպիոս Միրզախանյանի հանդիսապետությամբ և լուսարարապետ Տեր Մանուկ Զեյնալյանի մասնակցությամբ կատարվեց նախակրթարանի սաների և նրանցից երկուսի ծնողների մկրտության արարողություն:
Հայ Առաքելական Ուղղափառ Սուրբ Եկեղեցու Վիրահայոց Թեմ
Վիրահայոց թեմի մամլո հաղորդագրություն / 1 հուլիսի, 2013 թ.
ՀԱՅԵՐԵՆ
Русский
English
Դաս. հայերեն
French
