Երեւանում անցկացվելու է «Երկրները մեկ հարկի տակ» փառատոն-ցուցահանդես-վաճառքը
10-09-2013 19:06:27 | Հայաստան | Տնտեսություն
Սեպտեմբերի 20, 21, 22-ին Երեւանի Հյուսիսային պողոտայում կանցկացվի «Երկրները մեկ հարկի տակ» երկրորդ փառատոն-ցուցահանդես-վաճառքը, որին կմասնակցեն կմասնակցեն ինչպես տեղի արտադրող և ներկրող ընկերություններ, այնպես էլ` 18 երկրների 40 ընկերություններ, Հայաստանում գործող դեսպանատները և հյուպատոսությունները, սփյուռքահայ ներդրող գործարարներ:
Փառատոնի գլխավոր գործընկերը VIVA-CELL MTS ընկերությունն է: Փառատոնը կանցկացվի Սփյուռքի նախարար Հրանուշ Հակոբյանի բարձր հովանու ներքո:
Փառատոնին մասնակից տեղական, սփյուռքահայ եւ արտասահմանյան ընկերությունները ներկայացնելու են իրենց գործունեությունը: Ինչպես «Նոյյան Տապանի» մամուլի սրահում նշեց փառատոնի նախաձեռնող «ՋԻ ԷՄ ՋԻ» մեդիա գրուպ ընկերության տնօրեն Մարիամ Մանուկյանը, փառատոնի նպատակներից է ներկայացնել Հայաստանում գործող գործարարներին և նրանց գործունեությունը: Մյուս նպատակը արտասահմանցի, տեղական և սփյուռքահայ գործարարների համագործակցությունն է: 2 օր շարունակ ցուցահանդեսի շրջանակներում կհնչի տարբեր երկրների երաժշտություն՝ փառատոնն ունի նաեւ մշակութային բաղադրիչ: Սփյուռքահայերին տաղավարները կտրամադրվեն անվճար:
Ինչպես նշեց ՀՀ Սփյուռքի նախարարի մամուլի քարտուղար Մամիկոն Խուրշուդյանը, «Փառատոնը կարեւոր է սփյուռքահայ գործարարների համար, նրանք վերադառնում են հայրենիք, բաց երկնքի տակ մասնակցում են նախաձեռնությանը եւ հետաքրքիր օր անցկացնում»:
Փառատոնի շրջանակներում անցկացվող ցուցահանդես-վաճառքից, ինչպես նաեւ տեղում կազմակերպվող հանգանակությունից գոյացած հասույթի մեծ մասը հատկացվելու է սիրիահայերի աջակցման ֆոնդին: Ինչպես նշեց Մ.Մանուկյանը, «երբ Հայաստանը գտնվում էր նողկալի վիճակում, սիրիահայ շատ բարերարները մեր կողքին էին»: