Ա. Գեւորգյանն ընդունել է ՄԱԿ-ի ՓԳՀ գրասենյակի հայաստանյան ներկայացուցչին
24-09-2013 18:12:11 | Հայաստան | Տնտեսություն
ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց ՄԱԿ-ի Փախստականների գլխավոր հանձնակատարի գրասենյակի հայաստանյան նորանշանակ ներկայացուցիչ Քրիստոֆ Բիրվիրթին:
Փոխվարչապետը շնորհավորեց պրն Բիրվիրթին` առաքելությունը ստանձնելու կապակցությամբ` վստահություն հայտնելով, որ գրասենյակի հետ երկար տարիների արդյունավետ ու բազմաճյուղ փոխգործակցությունը կշարունակվի եւ դրական արդյունքներ կունենա նաեւ փախստականների եւ տեղահանված անձանց համար:
Փոխվարչապետը ներկայացրեց ինչպես Ադրբեջանից բռնագաղթածների, այնպես էլ սիրիահայերի խնդիրները: Նա առավել կարեւոր համարեց նրանց բնակարանային ապահովվածության հարցը` ափսոսանքով նկատելով, որ մինչ օրս հնարավոր չի եղել ամբողջությամբ լուծել Ադրբեջանից մոտ երկու տասնամյակ առաջ բռնագաղթածների բնակարանային խնդիրը: Հայաստանի կառավարությունը փորձում է նաեւ հնարավորության սահմաններում պայմաններ ստեղծել սիրիահայերի կեցության համար:
Միաժամանակ նա նկատեց, որ ՓԳՀ հայաստանյան գրասենյակի հետ համագործակցաբար հաջողվել է թեեւ ոչ մեծ մասշտաբի, բայց արդյունավետ ծրագրեր իրականացնել` մասնավորապես սոցիալական տների կառուցման եւ շահագործման ծրագրերը: Նա առանձնացրեց նաեւ գրասենյակի հետ համագործակցությունը թրաֆիքինգի դեմ պայքարի, միգրացիայի ոլորտում տարբեր հետազոտությունների իրականացման, ինչպես նաեւ իրավական փաստաթղթերի մշակման աջակցության ոլորտներում:
Հասարակայնության հետ կապերի բաժնից հայտնում են, որ Քրիստոֆ Բիրվիրթն իր հերթին պատրաստակամություն հայտնեց շարունակել արդյունավետ համագործակցությունը: Հայաստանի կառավարության համար նա կարեւոր համարեց փախստականների եւ տեղահանված անձանց համար անհրաժեշտ պայմանների ապահովումը` միաժամանակ պատրաստակամություն հայտնելով խնդրի վրա հրավիրել նաեւ միջազգային դոնոր կազմակերպությունների ուշադրությունը: