Հայ գրատպության անդրանիկ, Մադրասի «Ազդարար» հանդեսի վերահիմնադիր, արցախյան պատերազմի ազատամարտիկ  Մարտիկ Սարգսյանը, ով մի քանի ամիս է ինչ կալանավորված է,  օրերս դադարեց իր հերթական հացադուլը, որը տևեց 42 օր:

Հացադուլի նպատակն էր արագացնել  քրեական գործի հետաքննությունը  /այն ընդհանրապես դադարել էր/, որի մեջ իրեն մեղադրանք է առաջադրված, իսկ խափանման միջոցը ընտրված  է կալանքը:  Իր կալանավորման օրվանից /հոկտեմբերի վերջ / սա արդեն երրորդ հացադուլն է, եւ ընդհանուր առմամբ  Մ. Սարգսյանը  հացադուլների մեջ է եղել ավելի քան 100 օր:

Այժմ նա  «Նուբարաշեն» ՔԿՆ բուժ. մասում  վերականգնողական բուժօգնություն է ստանում.

Հիշեցնենք, որ Մ. Սարգսյանը դեռ 2013թ.-ի ամռանը ներքաշվել էր համակարգչային մի խարդախության  մեջ և ձերբակալվել էր:

«Նոր մարդ եմ դառնում, մանկան նման ուտել, քայլել ու շարժվել եմ սովորում, բայց կդիմանամ, Մարտակերտում ավելի դժվար էր»,- հեռախոսով ասաց  Մ. Սարգսյանը իրեն տեսակցության եկած «Ազդարար» ամսագրի ընդհանուր խմբագիր Գրետա Անդրեասյանին:

 Նա նշում է,  որ ոչինչ չունի իր կարգավիճակի դեմ, եւ եթե դատարանը որոշի, որ ինքը մեղավոր է, ապա պատրաստ է կրել արժանի պատիժը, և հետագայում վերականգնելով իր բարի անունը, շարունակել հանրաճանաչ «Ազդարար» համահայկական պարբերականի գործունեությունը: Նա շարունակում է իրեն համարել հայրենիքի նվիրյալ ազատամարտիկ ու լի է ստեղծագործական երազանքներով: Պարզապես հետաքննությունը ձգձգվում է,  իսկ  ազատության բաղձալի օրը ուշանում: Այդ է պատճառը, որ նա դիմում է ծայրահեղ քայլերի` պարբերական հացադուլների, ծայրաստիճան քայքայման  հասցնելով առանց այն էլ արցախյան ազատամարտում հաշմանդամ դարձած իր օրգանիզմը:

Մ. Սարգսյանը, ապրելով կալանավորի կյանքով և մոտիկից ծանոթանալով այդ փակ դռների ետևում ապրող ազատազրկված շատ մարդկանց իրական պատմություններին, հաստատ որոշել է` ողջ կյանքում պայքարել զուր և սխալ դատապարտված կալանավորների ազատութան և իրավունքների համար: Նա որոշել է նաեւ ազատության առաջին օրերին այցելել  իր պատճառով տուժածներին և հայցել նրանց ներողամտությունը:

Տեսակցության վերջում նա խնդրեց բոլոր սիրելի ու հավատարիմ ընթերցողներին աղոթել իր և ազատություն երազող մյուս բոլոր կալանավորների համար: