Երեւանում մեկնարկեց <Ազգային պատկերասրահ> միջազգային 10-րդ փառատոնը (Տեսանյութ)
07-05-2014 21:59:38 | Հայաստան | Մշակույթ
Հայաստանի ազգային պատկերասրահի Որմնանկարների սրահում մայիսի 7-ին մեկնարկեց «Ազգային Պատկերասրահ» Միջազգային Երաժշտական 10-րդ հոբելյանական փառատոնի բացման հանդիսավոր արարողությունը:
Միջոցառման բացմանը հնչեցին Հենդելի, Վիվալդիի, Մոցարտի, Ռոսինիի ստեղծագործությունները: Համերգային ծրագիրը ներկայացրեցին Հայաստանի Պետական Կամերային Նվագախումբը (գեղարվեստական ղեկավար և գլխավոր դիրիժոր՝ Վահան Մարտիրոսյան), մենակատար՝ Վարդուհի Խաչատրյանը (մեցցո-սոպրանո (Շվեյցարիա), դիրիժոր՝ Հարություն Արզումանյանի ղեկավարությամբ:
Տեղեկացնենք, որ «Արվեստների Պատկերասրահ» մշակութային հիմնադրամը` ՀՀ Մշակույթի նախարարության աջակցությամբ, մայիսի 7-ից հունիսի 3-ը ներկայացնում է «Ազգային Պատկերասրահ» միջազգային երաժշտական 10-րդ փառատոնը, որի գլխավոր գործընկերը ՎիվաՍել-ՄՏՍ-ն է:
Հիշեցնենք, որ փառատոնը հիմնադրվել է 2005թ.:Յուրաքանչյուր գարուն այն հայ հանդիսատեսին է ներկայացնում դասական երաժշտարվեստի գլուխգործոցներ՝ հայ և օտարազգի ճանաչված երաժիշտ-կատարողների մասնակցությամբ:
Ավանդական դարձած Փառատոնն իր շարունակականությունն է ստացել՝ Հայաստանի հեռահաղորդակցության առաջատար ՛ՎիվաՍել-ՄՏՍ-ի շնորհիվ , որն աջակցության իր առաքելությունը ստանձնեց 2006թ.-ից:
2008թ.-ից Փառատոնն ընդգրկվել է ՀՀ Մշակույթի նախարարության՝մշակութային միջոցառումների պետական աջակցության ծրագրում: