Բնապահպանական երիտասարդական վրանային ճամբար` Արցախում
09-06-2014 11:44:28 | Հայաստան | Հայտարարություններ
«Երիտասարդ կենսաբանների ասոցիացիա» ՀԿ-ն «Արցախի երիտասարդության զարգացման կենտրոն» ՀԿ-ի հետ համատեղ ընդունում է հայտեր «ԷկոԽնձրիստան» երիտասարդական վրանային ճամբարի մասնակցության համար: Վրանային ճամբարը տեղի կունենա ս.թ. հուլիսի 21-26 ԼՂՀ Խնձրիստան գյուղի տարածքում, վրանային պայմաններում: Կեցության (վրան և քնապարկ), սննդի և մասնակիցների տեղափոխման բոլոր ծախսերը հոգում են կազմակերպիչները: Մասնակիցների տեղափոխությունը կատարվելու է Երևան քաղաքից: Մասնակիցները ապրելու են դաշտային պայմաններում:
Ճամբարի նպատակն է խթանել էկոկրթությունը և առողջ ապրելակերպը Արցախում, կատարել հաջողված փորձի փոխանակում և Հայաստան-Արցախ երիտասարդական կազմակերպությունների համագործակցության զարգացում: Ճամբարին կարող են մասնակցել Հայաստանի և Արցախի 18-30 տարեկան երիտասարդ բնապահպաններ, բնապահպանության և հարակից ոլորտների ուսանողներ և մասնագետներ, երիտասարդական հասարակական կազմակերպությունների ներկայացուցիչներ, քաղաքացիական նախաձեռնությունների անդամներ և այլն:
Ճամբարի ընթացքում Հայաստանից և Արցախից շուրջ 60 մասնակիցների համար կիրականացվեն տեսական և գործնական դասընթացներ բնապահպանության, էկոտուրիզմի, առողջ ապրելակերպի, օրգանական սննդի և կամավորական աշխատանքի վերաբերյալ: Ճամբարի շրջանակներում կիրականացվեն ճանաչողական արշավներ, խաղեր, մրցույթներ, խմբային վարժանքներ և այլն: Նախատեսվում է նաև Հայաստանի և Արցախի երիտասարդական հասարակական կազմակերպությունների ներկայացուցիչների հանդիպում, որի ընթացքում կներկայացվեն կազմակերպությունների գործունեությունը, երիտասարդների համար առկա տեղական և միջազգային ծրագրերը, ինչպես նաև համագործակցության հնարավորությունները:
Գրանցվելու համար անհրաժեշտ է լրացնել մասնակցության առցանց հայտը՝ https://docs.google.com/forms/d/10ahf3r1bNB-3HErR4p63EGXisVxrCgZ_6geVdTlomkY/viewform
Հայտերի ընդունման վերջնաժամկետն է 2014թ. հուլիսի 1-ը:
Ծրագիրն իրականացվում է ՀՀ սպորտի և երիտասարդության հարցերի նախարարության ֆինանսական աջակցությամբ:
ՀԱՅԵՐԵՆ
Русский
English
Դաս. հայերեն
French
