Բնապահպանության նախարար Արամայիս Գրիգորյանն ընդունել է «Դանդի Փրիշս Մեթալս Կապան›› ՓԲԸ գլխավոր տնօրեն Ռիչարդ Հաուզին և  ընկերության գործադիր տնօրեն Հրաչ Ջաբրայանին:

    Բնապահպանության նախարար Արամայիս Գրիգորյանն ընդունել է «Դանդի Փրիշս Մեթալս Կապան›› ՓԲԸ գլխավոր տնօրեն Ռիչարդ Հաուզին և  գործադիր տնօրեն Հրաչ Ջաբրայանին: Հյուրերը շնորհավորել են Արամայիս Գրիգորյանին նոր պաշտոնը ստանձնելու կապակցությամբ և հույս հայտնել, որ այսուհետ ընկերության և նախարարության միջև համագործակցությունն առավել սերտ կլինի: Հրաչ Ջաբրայանը հակիրճ ներկայացրել է ընկերության գործունեությունը ՀՀ-ում և արտերկրում, նշել, որ  «Դանդի Փրիշս Մեթալս Կապան›› ՓԲԸ-ն պատրաստակամ է իր աշխատաոճով դառնալու օրինակելի մյուս հանքարդյունահանող ընկերությունների համար՝ հույս հայտնելով, որ նորանշանակ նախարարը կընդունի փոխգործակցության նոր առաջարկը:

   Արամայիս Գրիգորյանը շնորհակալություն է հայտնել շնորհավորանքի համար և նշել, որ Բնապահպանության նախարարությունը պարտավոր է և պատրաստակամ համագործակցելու ինչպես մյուս բոլոր, այնպես էլ «Դանդի Փրիշս Մեթալս Կապան›› ՓԲ ընկերության հետ` միաժամանակ ընդգծելով, որ  ընկերությունն ունի բնապահպանական և սոցիալական հստակ պարտականություններ Սյունիքի մարզի  և տեղի բնակչության հանդեպ, և այդ պարտականությունների կատարման պայմաններում է միայն ինքը տեսնում սերտ և արդյունավետ համագործակցություն: «Այն վնասներն ու կորուստները, որոնք հասցվում են բնությանը հանքարդյունահանման ընթացքում, պետք է կարողանաք հասցնել նվազագույնի և փոխհատուցել` խելամիտ  ռեկուլտիվացիա իրականացնելով և աչալուրջ լինելով պոչամբարների նկատմամբ››,-նշել է նախարարը:

Հրաչ Ջաբրայանն իր հերթին նշել է, որ ընկերությունն իր գործունեության մեջ առաջնորդվում է սոցիալական և բնապահպանական բարձր պատասխանատվության սկզբունքով:

Կողմերը պայմանավորվածություն են ձեռք բերել փորձաքննություն սկսել անտառվերականգնման ծրագրի իրականացման նպատակով: 

 

 

 

 

 

Նոյյան տապան  -   Տնտեսություն